Egîtîm Sen, sazî û rêxistinên civakî di roja 4an de li ber Wezareta Perwerdehiyê “Nobeda Jiyanê” berdewam kirin û bang li Wezîrê Perwerdehiyê Yusuf Tekîn kirin ku îstîfa bike.
Sendîkaya Kedkarên Perwerdehî û Zanistê (Egîtîm Sen) ku li dijî êrişên li ser dibistanên navçeya Sêwereg a Rihayê û Mereşe pêk hatibûn li ber Wezareta Perwerdehiyê dest bi “Nobeda Jiyanê” kiribû di roja 4an de li ber Wezaretê daxuyanî da. Gelek rêxistinên civakî, partiyên siyasî û şaxên Egîtîm Sen ên bajarên Bakurê Kurdistanê û Tirkiyeyê jî serdana nobedê kirin û beşdarî daxuyaniyê bûn.
Di daxuyaniyê de pankarta li ser, “Yusuf Tekîn îstîfa” dinivisî hat hilgirtin. Girsê bê navber dirûşmeyên, “Ev destpêk e, têkoşîn berdewam e”, “Em perwerdehiya demokratîk û laîk dixwazin” û “Kujerê zarokan rejîma qesrê ye” berz kirin.
Beriya daxuyaniyê ji bo kesên di êrişan de jiyana xwe ji dest dane deqîqeyeke rêz hat girtin. Piştî rêzgirtinê metna daxuyaniyê ji aliyê Serokê Giştî yê Egîtîm Senê Kemal Irmak ve hat xwendin.
‘Divê Yusuf Tekîn îstîfa bike’
Kemal Irmak anî ziman ku berpirsê van bûyeran Yusuf Tekîn divê îstîfa bike û wiha got: “Hêrsa me ji êşa me mezintir e. Me 3 rojan kar berda û ev 4 roj in jî em li ber Wezareta Perwerdehiyê nobeda xwe didomînin. Ji ber ku em dizanin yên di vê avahiyê de rûniştinê şûna ewlehiya jiyana me biparêzin kursiyên xwe difikirin. Tundiya li dibistanan bi tenê ewlehiyê ve nayê pênasekirin. Ev bûyer ji perwerdehiyê heta çandê, ji aboriyê heta civakî encamên polîtikayên şaş in. Polîtîkayên tundiyê rewa dikin, polîtikayên dijberiyê dibin sedam ku zarokên 14-15 salî bibin kujer. Yên zarokan teşwîqî mafyayê û tundiyê dikin ku dibistan kirine qada tundiyê. Çareserî ew e ku polîs tevdîran bigirin. Çareserî di veguherîneke bingehîn de ye. Çareserî perwerdehiya laîk, demokratîk, perwerdehiya di mafê zimanê dayikê de, wekheviya zayendî û zanistê de ye.”
‘Têkoşîna me dê berfirehtir bibe’
Kemal Irmak diyar kir ku heta pirsgirêk bi awayekî bingehîn bên çareserkirin dê têkoşîna xwe bidomînin û wiha pê de çû: “Yusuf Tekîn ji dema hatiye ser peywîrê û heta niha ji pirsgirêkên perwerdehiyê re çavê xwe girtiyê. Bi daxuyaniyan rûmeta mamosteyan binpê kiriye, dibistan kirine labaratuara birdoziyan. Heke mamostê û şagirt di dibistanan de tên kuştin berpirs hûn in. Divê Yusuf Tekîn ji civakê lêborîn bixwazê û îstîfa bike. Têkoşîna me wê ji niha şûn ve jî li her derê bidome.”
‘Rizandina civakê encama polîtîkayên dijberî, rant û tundiyê ye’
Hevseroka KESKê Ayfer Koçak jî destnîşan kir ku ew ê têkoşîna xwe ji bo keda wan bi qîmet be bidomînin û wiha axivî: “Ji bo wê me digot; divê xizmetên tenduristiyê ji bo hemû civakê bin, demokratîk laîk, bi zimanê dayikê bin û li gor zanistê bin. Ji bo wê em têkoşîna aştî, parastina xwezayê û azadiya jinan dimeşînin. Desthilatê polîtîkayên tund di nava civakê de çêkir û dijberî ava kir. Pêşiya qetilkirina jinan vekir. Helbet berpirsên wê diyar in. Yek jî li vir e. Wezîre Perwerdehiyê ye. Ji bo wê em dibêjin îstîfa bike. Rizandina civakî encama polîtîkayên dijberî, rant û tundiyê ye. Heke em dixwazin ji vê rewşe rizgar bibin divê em bo hev re ji van polîtîkayan re bêjin na.”
Piştî daxuyaniyê beşdar axivîn û hest û daxwazên xwe anîn ziman.
