Sekreterê Şaxa Egîtîm Sen a Wanê Lokman Babat di daxuyaniya ku bi boneya destpêkirina serdema nû ya perwerdehiyê de axivî û da zanîn ku perwerdehiya bi zimanê dayikê ne tenê hewcedariyeke bingehîn e, di heman demê de mafekî mirovî ye ku bi qanûn û pênasînên navneteweyî hatiye misogerkirin.
Komeleya Pêşvebirina Çand û Zimanê Kurdî (KURDÎGEH) û Komîsyona Zimanê Kurdî ya Şaxa Egîtîm Sen a Wanê bi boneya destpêkirina serdema nû ya perwerdehiyê li Kolana Hunerê ya Wanê daxuyanî da. Di daxuyaniyê de pankarta “Statuya Kurdî, perwerdehiya bi Kurdî” hat vekirin û dirûşmên “Ziman rûmeta me ye” hat berzkirin. Hevserok û rêveberên partiyên siyasî, nûnerên saziyên sivîl û demokratîk û welatî tev li daxuyaniyê bûn.
‘Divê dewlet li gorî rihê pêvajoyê tevbigere’
Metna daxuyaniyê ji aliyê Sekreterê Şaxa Egîtîm Sen a Wanê Lokman Babat ve hate xwendin. Lokman Babat diyar kir ku perwerde ne tenê pêvajoyekî hînkirinê ye û got: “Zimanê dayikê mafekî bingehîn, amûrekî wekheviyê û bingeha avakirina civakekî azad û demokratîk e. Ji ber vê yekê, zimanê ku zarok bi wî zimanî dinyayê nas dike, difikire û xwe îfade dike, divê di nav pergala perwerdehiyê de jî cih bigire. Di pêvajoya perwerdehiyê de ziman rolekî sereke dilîze. Ziman kesayet û nasnameya zarokan diafirîne. Ji ber vê jî em wekî sazîyên ziman astengîyên li hemberî bi karanîna mafê xwe yê perwerdehiya zimanê dayîkê wekî astegîyên hemberî nasnameya Kurdan dibînin. Wekî tê zanîn pêvajoya aştî û civaka demokratîk li ser esasa wekhevî û edaletê tê avakirin. Aştîya civakî jî bi rêz girtina nirxên neteweyan dest pê dike. Ziman jî nirxên neteweyan yên herî girîng e. Divê rayedarên dewletê li gor rihê pêvajoya aştî û civaka demokratîk tevbigerin û astengîyên di destura bingehîn de û qanunên girêdayî van demildest bi guherînin û hemû astengîyên li hemberê perwerdeya bi zimanê dayîkê ji holê rakin.”
‘Şanaziya perwerdehiyê mafê her zarokî ye’
Lokman Babat diyar kir ku ji bo avakirina Aştî û Civaka Demokratîk hewce ye pergala perwerdehiyê ya Tirkiyeyê jî ji nû ve bê sazkirin û axaftina xwe wiha bi dawî kir: “Divê mûfredata pirzimanî, aştî, demokratîk, wekhevîya zayendî û ekolojîk bê çêkirin. Lewre zimanê dayîkê mafekî sirûştî, mirovî û gerdûnî ye. Perwerdehiya bi zimanê dayîkê bingehê mafê perwerdehiyê bixwe ye. Zimanekî ku di perwerdehiyê de neyê bikaranîn, rûbirûyî xetereya windabûnê dimîne. Şanaziya perwerdehiyê mafê her zarokî ye. Perwerdehiya bi zimanê dayikê ne tenê hewcedariyeke bingehîn e, di heman demê de mafekî mirovî ye ku bi qanûn û pênasînên navneteweyî hatiye misogerkirin.”
Daxuyanî bi berzkirina dirûşmeya “Perwerdehiya bi zimanê dayîkê mafê me ye” bi dawî bû.
