Platforma Piştevaniya Jinan a Aydinê, bi boneya 8ê Adarê Roja Jinên Kedkar ên Cîhanê, meşiya û daxuyaniyek da. Di daxuyaniyê de hat diyar kirin ku desthilatdar çavê xwe berdaye mafên jinan û destkeftiyên wan xesp dike.
Platforma Piştevaniya Jinan a Aydinê, bi boneya 8ê Adarê Roja Jinên Kedkar ên Cîhanê, meşiya û daxuyaniyek da. Meş ji ber Taş Kopruyê dest pê kir û heta Meydana Bajêr domiya. Di meşê de pankrata “Em têkoşîna aştî û azadiyê bilind dikin” hate bilindkirin û dirûşmeyên “Jin, Jiyan, Azadî”, û “Bijî têkoşîna jinan” hatin berzkirin. Gelek jin beşdarî meşê bûn. Li ser navê platformê, metna çapemeniyê ji aliyê Tugçe Gunduz ve hat xwendin.
‘Bêkariya jinan gihîşt ji sedî 45’an’
Tugçe Gunduz bal kişand ser xizaniya jinan a ku bi polîtîkayên desthilatdariyê re kûrtir dibe û diyar kir ku barê malê û kedê her ku diçe li ser milê jinê giran dibe û got: “Li Tirkiyeyê rêjeya bêkariya jinan gihişt %45an. Bi sed hezaran keçên ku ji ber xizanî, pirsgirêka stargeh û xwarinê nikarin hewcedariyên xwe yên bingehîn dabîn bikin, ji perwerdeyê dûr dikevin. Bi guhertinên di perwerdeyê de, perwerdeya zanistî, laîk û wekhevparêz tê tunekirin; li şûna wê, ji temenê biçûk ve dabeşkirina kar a zayendperest li ser zarokan tê ferzkirin.”
‘Destkeftiyên me tên xespkirin’
Tugçe Gunduz di berdewamiya axaftina xwe de bal kişand ser kuştina jinan û wiha pêde çû: “Rojê herî kêm sê jin tên qetilkirin. Tenê di meha yekem a sala 2026an de 22 jin hatin kuştin û mirina 14 jinan jî wekî ‘bi guman’ derbasî qeydan bû. Ji ber polîtîkayên bêcezahiştinê, kujer hîn jî dibin gef li ser jiyana jinan. Bi vekişîna ji Peymana Stenbolê û bêbandorkirina Qanûna Hejmar 6284an, dijminatiya li hemberî jin û LGBTİ+yan tê belavkirin. Desthilatdarî bi piştgiriya tarîqat û cemaatan, çavê xwe berdaye mafên me yên di Zagona Medenî de û dixwaze destkeftiyên me yên bi têkoşînê hatine bidestxistin, xesp bike.”
‘Em ê bi piştevaniyê vê tarîtiyê bişikînin’
Tugçe Gunduz destnîşan kir ku şer û krîzên aborî barê jinan girantir dike, desthilatdariya ku destûr û mafên bingehîn binpê dike, daxwazên me yên herî biçûk jî bi zext, binçavkirin û girtinan asteng dike û got: Li girtîgehan jî binpêkirinên giran hene; girtiyên nexweş bi mirinê re rû bi rû ne û bi polîtîkayên tecrîdê şert û mercên jiyanê giran dibin. Lê em dizanin ku bi rêxistinbûn û piştevaniyê, em ê vê tarîtiyê derbas bikin. Ji Rojava heta Filistînê, ji Afganistanê heta Îranê; em ê bi têkoşîna xwe ya ku sînoran nas nake, deng û çalakiya jinan mezin bikin. Em teslîmî tarîtiyê nabîn!”
Daxuyanî bi dirûşman bi dawî bû.
