Amed – Amed di bin bihayên zêde de xwe ji bo pêşwazîkirina Cejna Qurbanê amade dike. Liv û tevgera cejnê mîna kelecana salên berê nade nîşandan û her kes xweziya xwe bi cejnên berê tîne.
Li Amedê di berbanga Cejna Qurbanê de welatî di bin barê aboriyê de dinalin. Li kolan û bazarên Amedê tevgerereke bêdeng heye. Her çend di rojên asayî de li bajaran amadekariyên cejnê yên berê bi kelecan û daxwazeke mezin dest pê bikira jî, îsal ji ber krîza aborî ya ku her ku diçe dijwartir dibe, welatî nikarin hewcedariyên xwe yên bingehîn jî bikirin. Şêniyên Amedê tînin ziman ku ji ber bihabûnê “tu tam û teama cejnê nema ye.”
Ji ber enflasyona zêde ji şîraniyê heta cil û bergan û bi taybetî jî bihayê sewalên qurbanê du car û sê car zêde bûye. Welatiyên ku berê ji bo cejnê kincên nû ji zarokên xwe re dikirîn, îsal dibêjin ku daxwaza wan a herî mezin tenê derbaskirina rojê ye. Ji ber giraniyê xelk nikare weke berê zêde tiştan bikire, ev rewş rasterast bandorê li ser amadekariyên cejnê jî dike.
Li navçeya dîrokî ya Sûrê ya Amedê, firoşkar ji vê bêdengiya bazarê bi fikar in. Dikandaran diyar kir ku tevî ku cejn pir nêzîk bûye jî, firotina wan li gorî salên bihûrî gelekî kêm bûye û xelk ji ber krîza aboriyê nikare lazimatiyên xwe dabîn bikin.
