Bi pêşengiya Şaredariya Bajarê Mezin a Amedê, 2yemîn Hevdîtina Jin, Ked û Çand-Hunera Amedê bi diruşma “Xuyakirina keda jinê, piştgirî û têkoşîna hevpar” li Qada Şêx Seîd dest pê kir.
Hevdîtina ku ji aliyê Serokatiya Daîreya Polîtîkayên Jinan a Şaredariya Bajarê Mezin ve hat amadekirin, bi beşdariya hevşaredarên navçeyan, saziyên jinan, sendîka, kooperatîf û gelek jinan li Qada Şêx Seîd bi coşeke mezin dest pê kir. Hevşaredarên Amedê û navçeyên wê, endam û rêveberên rêxistinên jinan, sendîka, kooperatîf di nav de gelek jin beşdarî hevdîtinê bûn. Hevşaredara Bajarê Mezin a Amedê Serra Bûcak di destpêkirina çalakiyê de axivî û bal kişand ser girîngiya xuyakirina keda jinê û veguhastina civakî.
‘Em dixwazin keda jinê xuya bibe’
Hevşaredara Bajarê Mezin a Amedê Serra Bûcak di vekirina hevdîtinê de axivî û bal kişand ser girîngiya xuyakirina keda jinê. Serra Bûcak diyar kir ku jin bi hilberîn û hunera xwe têkoşîna jinê xurt dikin û wiha got: “Jinan careke din fêm kir ku hilberîn û piştevanî çiqas bi wate ye. Em dixwazin ber bi pêvajoyeke wiha ve biçin ku jin di qada giştî, kar, siyaset û di hemû mekanîzmayan de hebin.”
‘Piştgiriya jinan hêza hilberînê xurt dike’
Serra Bûcak spasiya hemû xebatkarên kooperatîf û saziyên jinan kir û destnîşan kir ku jin bi piştgiriyê hêza xwe ya hilberînê careke din dîtine. Serra Bucak anî ziman ku Amed dê bibe bajarê jinan û qadên ku jin lê tên cem hev dê bêtir werin mezinkirin.
‘Hevdîtin dê du rojan bidome’
Seroka Daîreya Polîtîkayên Jinan Ozden Gurbuz Sumer jî diyar kir ku ev hevdîtin qadeke girîng e ku jin berhemên xwe yên salekê lê parve dikin. Ozden Sumer destnîşan kir ku hêza jinan a bi piştgiriyê, di her qada jiyanê de guhertinê bi xwe re tîne.
Piştî axaftinan, jinan li ber dengê muzîkê govend gerandin û li stantên ku hatine vegirtin geriyan. Di çarçoveya bernameyê de atolyeyên boyaxkirina camê û veguherandinê jî hatin lidarxistin.
Bernameya hevdîtinê dê bi konser û çalakiyên hunerî du rojan berdewam bike.
Bernameya îro dê di saet 19:00an de bi konsera koma KASED JIN berdewam bike.
