Kongra Star cezayê darvekirinê yê li dijî Pexşan Ezîzî û Werîşe Mûradî şermezar kir û bang li rêxistinên navneteweyî kir da ku cezayê darvekirinê rawestîne.
Kongra Star a kantona Firatê têkildarî biryara cezayê darvekirinê yê li dijî çalakvanên Kurd Pexşan Ezîzî û Werîşe Mûradî daxuyaniyek da. Endama Kongra Star Meysûn Kawar li Qada Jina Azad a Kobanê daxuyanî xwend. Meysûn Kawar di daxuyaniyê de wiha got: “Beriya çend rojan Dadgeha Bilind a Îranî biryarek da; biryara darvekirinê ya li hember her du çalakvanên Kurd Pexşan Ezîzî û Werîşe Mûradî, bi sûcdariya serhildana çekdarî li dijî dewletê û girêdana bi komên dijber ve. Her du çalakvanên Kurd rastî îşkenceya fîzîkî û derûnî hatin. Her wiha serdanên malbatên wan jî qedexe kirin û destûr nedan ku ji wan re parêzerek bê girtin da ku wan biparêze. Wekî ku tê zanîn hevrê Pexşan wek çalakvaneke civakî li Bakur û Rojhilatê Sûriyeyê kar dikir û piştgiriya keçikên ku ji DAIŞ`ê dihatin rizgarkirin, dikir. Werîşe jî wek çalakvanekê di berxwedana Kobanê de cihê xwe girtibû, li hember terora DAIŞ`ê berxwedaneke bêhempa dikir.”
Meysûn Kawar di daxuyaniya xwe de cezayê darvekirinê şermezar kir û bang li hemû rêxistinên navneteweyî, rêxistinên mafên mirovan û civata navneteweyî kir ku destwerdanê bikin û cezayê darvekirinê betal bikin.
