Platforma Saziyên Demokratîk li Êlihê têkildarî êrişên çeteyên HTŞê, DAIŞê û yên girêdayî Tirkiyeyê meşeke girseyî pêk anî. Hevserokê DBPê Keskîn Başindir bang li gelê kurd kir ku bi ruhê seferberiyê têbikoşin.
Bi pêşengiya Platforma Saziyên Demokratîk ên Êlihê têkildarî êrişên çeteyên HTŞê, DAIŞ û komên ku Tirkiye piştgiriyê dide wan li ber deriyê AVMya WORDMARê kom bûn û heta parka 8ê Adarê ya jinan meşiyan. Di çalakiyê Hevserokê Giştî yê DBPê Keskîn Bayindir, parlamenterên Sêrtê Sabahat Erdogan Saritaş û nûnerên gelek rêxistinên saziyên ên bajêr amade bûn. Girseyê di çalakiyê de pankarta “Xwedîderketina Rojava xwedîderketina mirovahiyê ye” vekir û meşiya. Girseya ku beşdarî çalakiyê bûn diruşmeyên “Bijî berxwedana Rojava”, “HSD gel e gel li vir e”, “Rojava Rojhilat e Kurdistan yek welat e”, “Kürdistan Kurdistan gora faşîst an” berzkirin. Dîsa dowîzên “Şoreşa Rojava şoreşa jinê ye” û “Rojava rûmeta mirovahiyê ye” rakirin.
‘Ev çi wijdan e? Ev çi mirovahî ye?’
Hevserokê Giştî yê DBPê Keskîn Bayindir di meşe de bertek nîşanî medyayên ku piştgiriyê didin HTŞê û got: “Serê zarokên Kurd jê dikin û jinan ji avahiyan diavêjin. Piştre li Enqerê dibêjin ‘Em bira ne.’ Em biratiyek wisa şermezar dikin. Em vê yekê qebûl nakin. Her roj daxuyaniyên piştgiriya HTŞê tên dayîn. Hey mirovên bêdil hey mirovên bêexlaq, hûn wan kesên ku cenazeyên ciwanên Kurd dişewitînin, zarokan dişewitînin û jinan dikujin pîroz dikin. Ev çi wijdan e? Ev çi mirovahî ye?”
‘Em ê heta dawiyê li ber xwe bidin’
Di berdewamê de Keskîn Bayindir silavên gelê Rojava ji gele Êlihê re got û wiha axivî: “Ew dixwazin bi hemû hêza xwe li kêleka HTŞê bin. Bi zimanê qirêj her tim êrîş dikin. Ez çûm Qamîşloyê ji me re gotin, ‘Em şer, mirin û komkujiyan naxwazin. Rojava gelek komkujî dîtiye. Heta ku derfet hebin em aştiyê dixwazin. Lê bila bê zanîn Tirkiye û dewletên din bizanin ku em ê axa xwe nedin tu kesî. Encam çi dibe bila bibe, em ê heta dawiyê li ber xwe bidin.’ Kobanî di bin dorpêçê de ye, ne elektrîk û ne jî av heye. Em dixwazin deriyê Pirsûsê were vekirin. Lê ew me ber bi deriyên ku ji hêla HTŞê ve têne kontrol kirin ve dibin. Em şer naxwazin. Lê ew di şer de israr dikin. Ew Kurdek bê statu, bê nasname û bê ziman dixwazin. Em vê yekê qebûl nakin. Em ji tu derê narevin. Em ê heta dawiyê li ber xwe bidin.”
‘Hezar silav ji bo ruhê berxwedanê yê li Rojava’
Keskîn Bayindir di dawiya axaftina xwe de wiha got: “Hemû cîhan bala xwe daye Rojava. Gel ji bo Rojava li ber xwe didin. Bi milyonan Kurd dibin yek û tev li têkoşînê dibin. Her têkoşîneke ku em li vir dikin moralek mezin dide Rojava. HTŞ û DAIŞ wan ev yek bi kiryarên xwe nîşan daye. Hûn dixwazin bibin cîranên gelê Kurd ê bi rûmet an DAIŞa bêrûmet? Vê biryarê bidin. Kurd radibin ser piyan, Kurd li ber xwe didin. Em di rojên pir girîng re derbas dibin. Divê hemû gelê me bi ruhekî seferberiyê şer bike. Hezar silav ji bo ruhê berxwedanê yê li Rojava. Em ê heta dawiyê bi wan re bin.”
Çalakî bi dirûşmeya “Yek e yek e yek e Kurdistan yek e” bi dawî bû.
