Keskîn Bayindir ê ku di hevdîtina gel a li Tetwanê de axivî, bal kişand ser pêvajoya ku bi saya têkoşîna bi salan destpêkiriye û wiha got: “Êdî em ji bo çareseriyê hêzek in.”
Partiya Herêmên Demokratîk (DBP) di çarçoveya hevdîtinên gel ên bi dirûşma ‘Em gotina aştiyê bi gel re ava dikin’ li navçeya Tetwan a Bedlîsê, bi nûnerên rêxistinên sivîl re civiya. Hevserokê Giştî yê DBPê Keskîn Bayindir tev li hevdîtina ku li kargehekê hat lidarxistin bû. Li eywana ku hevdîtin lê pêk hat, pankarta “Em gotina aştiyê bi gel re ava dikin” hat daliqandin.
Keskîn Bayindir di hevdîtinê de axivî û da zanîn ku ji pêvajoyeke girîng a aştiyê tê derbaskirin û pêvajoyên çareseriyê yên berê ku bi ser neketin bi bîr xist. Keskîn Bayindir bal kişand ser Pêvajoya Aştî û Civaka Demokratîk a ku Rêberê Gelê Kurd Abdullah Ocalan daye destpêkirin û wiha got: “Di vê pêvajoyê de divê mirov tenê li benda dewletê nemîne, lê ji bo pêşveçûna pêvajoyê divê hikûmet gavan biavêje. 2 sal in mirin û pevçûn nîn in, ev tiştekî bi qîmet e. Lê meseleya Kurd tenê ne ‘çekberdan’ e. Ev rêya çareseriya meseleya Kurd e. Gelê Kurd statuya xwe dixwaze, di destûrê de naskirinê dixwaze. Meseleya gelê Kurd ev e. 2 sal in em li her quncikekî welat behsa aştiyê dikin. Em dixwazin gotina aştiyê bi gel re biaxivin, fikrên gel û civakê bigirin.”
Serokê Yekîtiya Odeyên Esnaf û Pîşesazan a Bedlîsê Ayvaz Canevî jî da zanîn ku ew li pişt pêvajoyê ne û wekî rêxistinên sivîl ji bo pêvajoyê çi hewce bike ew ê bi cih bînin.
‘Li dijî zilmê serhildan heye’
Piştî hevdîtina bi rêxistinên sivîl re, li gundê Avêtax ê ser bi Tetwanê ve hevdîtina gel hat lidarxistin. Keskîn Bayindir li vir jî axivî û ev yek anî ziman: “Dîroka Kurdan û dîroka tevgera xwe em hemû dizanin û nîqaş dikin. Bi sedan sal in li dijî zilmê serhildan heye. Bi têkoşîna Tevgera Azadiya Kurd û Rêber Apo li dijî înkarê têkoşînek hat dayîn. Di encama têkoşînê de hikûmet û dewletên herêmê Rêberê me kirin muxatab. Ev 2 sal in maseya muzakere û çareseriyê heye. Ev yek di encama hêza têkoşîna vê tevgerê û Rêber Apo de pêk hat. Êdî em ji bo çareseriyê hêzek in.”
Piştre welatiyên ku mafê axaftinê girtin diyar kirin ku baweriya wan bi Abdullah Ocalan tam e û teqez kirin ku divê desthilatdarî gav biavêje û ji bo pêşvebirina pêvajoyê hewl bide.
Hevdîtin wê li gundên Şîrînşas û Siwarê berdewam bikin.
