Desteya Tenduristiyê ya Rêveberiya Xweser a Şengalê ji ber astengkirina şandeya bijîşkên Îtalî dewleta Iraqê şermezar kir û xwest pêşî li şandeyên xêrxwaz û alîkariyê were vekirin.
Şandeyeke bijîşk û xêrxwazên Îtalî xwestin di 24ê gulanê serdana Şengalê bikin. Lê şande li Telaferê ji aliyê hêzên Iraqê ve hate astengkirin. Şande tevî astengiyan jî xwe gihandin Şengalê lê, ji Şengalê hatin derxistin. Şande ku berê jî sardana Şengalê kiribû, xwedî projeyên civakî û tenduristiyê bû, xwest hem çavdêriya wan projeyan bike hem jî projeyên nû pêş bixe.
Desteya Tenduristiyê ya Rêveberiya Xweser a Şengalê jî bi daxuyaniyeke çapemeniyê astengkirina hempîşeyên xwe û şandeya Îtalî ya bi armanca xizmetkirina ji gelên Şengalên re serdan kiribû, şermezar kir. Di daxuyaniya Desteyê de banga helwesta li saziyên mafê mirovan kir.
Bijîşk û kedkarên Desteya Tenduristiyê li Nexweşxaneya ‘Şehîdên Xanesorê’ têkildarî astengiyê daxuyaniyeke çapemeniyê da. Daxuyanî ji aliyê Endamê Desteya Tenduristiyê Dr. Şêx Nûrî ve hate dayîn. Di daxuyaniyê de hate xwestin, saziyên alîkariyê û xêrxwaz bê astengî bikarin bikevin Şengalê û banga helwestê jî li saziyên navnetewî yên parastina mafê mirovan dikin, hate kiri.
Berfirehiya daxuyaniyê wiha ye:
“Em, weke Desteya Tenduristiyê ya Rêveberiya Xweser li Şengalê, didin diyar kirin ku em saziyek rêxistinkirî ne û xizmetên tenduristiyê bêberamber ji xelkê herêmî re bê cudahî pêşkêş dikin. Ev yek piştî komkujiya Şengalê di sala 2014’an de û wêrankirina binesazî û navendên tenduristiyê pêk hat.
Roleke mezin a vê rêxistinê di xizmetkirina ji Şengalê re heye
Em helwesta hêzên girêdayî Iraqê ya li navçeya Şengal û Telaferê ya li hember şandeya Îtalî, şermezar dikin. Rêxistina (IL Kurdistan) xwedî roleke mezin e di xizmetkirina welatiyên herêmê û kesên ji kampên koçberiyê vegeriyayî de, bi pêkanîna projeyên xizmetguzarî di warên perwerde û tenduristiyê de.
Ev rêxistin berê jî gelek caran serdana Şengalê kiriye
Tê zanîn ku ev rêxistin berê jî gelek caran û bi awayekî fermî serdanên xwe ji bo şopandina rewşa mirovî û xizmetguzarî li Şengalê kiribû û dixwest ku xizmetên xwe yên bingehîn di warên perwerde, tenduristî û şaredariyan de bidomîne. Lê belê, hêzên Iraqê li navçeyên Telafer û Şengalê, endamên heyetê ji ketina herêmê û şopandina projeyên wan asteng kirin û ew neçar kirin ku ji herêmê derkevin.
Divê saziyên mafê mirovan li dijî van kiryarên Iraqê derbikevin
Ji ber vê yekê, em bang li hemî kesayetiyên ku di warê mirovî û xizmetguzarî û mafên mirovan de dixebitin, û saziyên civaka sivîl yên herêmî û navneteweyî dikin ku destwerdanê bikin ji bo rawestandina van kiryar û helwestên Hikûmeta Iraqê yên li hember rêxistin û komeleyên xêrxwaziyê, yên ku bi dilpakî hewl didin xizmetên bingehîn û girîng ji welatiyan re peyda bikin û di piştgirî û avakirina herêma Şengalê de bibin alîkar.”
