Kedkarên ku bi boneya 1ê Gulanê li Qada Îstasyonê ya Amedê kom bûn, diyar kirin ku li dijî neheqî û pergala kapîtalîst tenê rêyek heye; ew jî yekitî û têkoşîna hevpar e.
Bi pêşengtiya KESK, DÎSK, TMMOB, TTB û Platforma Saziyên Demokratîk a Amedê, bi hezaran kesan li Qada Îstasyonê ya navçeya Yenîşehîr a Amedê mitîngek hate lidarxistin. Di mitîngê de bi dirûşm, dowîz û pankartan têkildarî mafên karker û kedkaran, pêvajoya heyî û krîza aboriyê peyam hatin dayîn û axaftin hatin kirin. Karker û Kedkarên tev li mitîngê bûn ji ajansa me re axivîn.
‘Hêviya me jî gelek mezin e’
Vehbî Guzel bal kişand ser zehmetiyên debara jiyanê û astengiyên li pêşiya kedkaran û wiha got: “Li her derê armanca me ew e ku em 1ê Gulanê bi bîr bînin, em bejna xwe li ber şehîdên 1ê Gulanê ditewînin. Neheqiyek heye. Mesele hevalên me mûçeya herî kêm dixwazin, ji bo nan keda xwe têdikoşin. Lê belê li her derê li pêşiya wan astengî heye. Em karker hemû dê bibin yek, em ê destê xwe bidin hevdû, bi yek dengî em ê dengê xwe bilind bikin û piranî mafê xwe em ê bi dest bixin. Hêviya me jî gelek mezin e.”
‘Pêşeroja zarokên xwe em ronahî bikin’
Servet Pala jî destnîşan kir ku têkoşîna wan ji bo nifşên nû ye û wiha pê de çû: “Taybet ji bo mafê karkeran em bi dest bixin, em her dem li qadan e, em dengê xwe bilind dikin. Lê em ji vê desthilat û pergalê daxwaza mafê hemû karker û karkerên din jî dikin. Îro ji bo demokrasiyê ev çalakiyên me ji bo me hemûyan girîng e. Em li ser vî ne, em ê serê xwe netewînin. Heyanî dawiyê çi mafê me hebe em ê bînin cih. Çi ser milê me bikeve, yanî pêşeroja zarokên xwe em ronahî bikin. Ev ji bo me hemûyan lazim e.”
‘Ji bo azadiyê em ê her dem li qadan bin’
Sînan Ok jî bal kişand ser girîngiya qadên siyasî û demokratîk û wiha axivî: “Têkoşîna ji bo wekhevî û demokrasiyê bi biryardarî dimeşe. Roja 1ê Gulanê, roja karker û kedkaran e. Têkoşîna siyasî û demokrasiyê her dem herî pêş de ye. Sîyaset û demokrasî ji bo me girîng e, ji bo azadiyê em her dem li qadan bin û daxwaza mafê kedkaran bikin.”
‘Em ê têkoşîna xwe ya ji bo wekheviyê berdewam bikin.’
Yasemîn Kaçiran jî li ser navê jinên kedkar banga berxwedanê kir û wiha domand: “Ez dixwazim roja 1ê Gulanê li hemû karkeran pîroz bikim. Îro karker û kedkar hemû li qadan in. Her çendî astengî hebin jî, em dixwazin keda me neyê xwarin. Wekî jin û wekî kedkar, em dibêjin 1ê Gulanê pîroz be. Em ê têkoşîna xwe ya ji bo wekheviyê berdewam bikin. Mafê me yê karkeriyê heye, em ê heta dawiyê li ser vî mafî bin.”
‘Heyanî niha çi mafê me hebe, em ê bînin cih.’
Mustafa Alphan jî li dijî pergala kedxwariyê helwesta xwe wiha diyar kir: “Têkoşîna ji bo aştiyê û demokrasiyê bi biryardarî dimeşe. Roja 1ê Gulanê pîroz be. Têkoşîna siyasî û demokrasiyê her dem herî pêş de ye. Em ê li dijî vê sîstema kapîtalîst her dem serê xwe hildin û mafê kedkaran biparêzin. Heyanî niha çi mafê me hebe, em ê bînin cih.”
‘Em ê dev ji daxwazên xwe bernedin’
Recep Demîr jî di axaftina xwe de daxwaza edaletê wiha anî ziman: “Heq, hiqûq, edalet. Ji bo her kesî pêwîst e ku îro li vê qadê be. Ji bo aştiyê, ji bo kedkaran, ji bo azadiyê. Ez dibêjim em ê her sal dengê xwe derxin, em ê her sal li vir bin û em ê dev ji daxwazên xwe bernedin. Ked ne heram e, ked helal e.”
