Şirnex – Parlamenterê DEM Partiyê yê Mêrdînê Kamûran Tanhan bi lêv kir ku sekinandina wan a li deriyê sînor bêhiqûqî û bêexlaqî ye û destnîşan kir ku heta ew cenazeyên rojnamevan Nazim Daştan û Cîhan Bîlgîn nestînin dê li deriyê sînor bin.
Şandeya ku ji Parlamenterê DEM Partiyê yê Mêrdînê Kamûran Tanhan, bavê rojnamevan Nazim Daştan, bavê rojnamevan Cîhan Bîlgîn, endamên Komeleya Hiqûqnasên ji bo Azadiyê (OHD), Komeleya Yekitî Çand Piştevanî û Alîkariyê ya bi Malbatên ku Xizmên Xwe li Dêrguşa Şaristaniyê Windakirine re (MEBYA-DER) û Komeleya Rojnamegeran a Dicle Firatê (DFG) pêk tê ji bo cenazeyê rojnamevan Nazim Daştan û Cîhan Bîlgîn wergirin di 6ê Çileyê de hatin Deriyê Sînor ê Xabûrê. Lê şandê 2 roj in bi hincetên cuda cuda li Deriyê Sînor ê Xabûrê tên sekinandin.
‘Bi biryareke keyfî me didin sekinandin’
Parlamenterê DEM Partiyê yê Mêrdînê Kamûran Tanhan bertek nîşanî sekinandina şandeyê da û wiha got: “Bi biryareke keyfî me li vir didin sekinandin. Ji 6ê mehê ve em li vir in. Her roj bi hezaran wesayît li vir diçin û tên lê niha bi biryareke keyfî me didin sekinandin. Ji bo me ew qad girtine. Ji bilî me tu kes tune ye li vir. Ev yek bêhiqûqî û bêexlaqî ye. Biryareke siyasî û keyfî ye. Dibêjin ev biryar ji Enqereyê hatiye. Heta Enqere destûr nede em nahêlin. Ji me re tiştek wisa negotin. Lê ji hevalên me yên ku lu vir daxuyanî dabûn re wisa gotibûn. Heke ji me re wisa bigota me jî bigota girtekê bigrin em jî li gor wê serî li dozgeriyê bidin.”
‘Heta ku em encamekê nestînin ji vê qade dernakevin’
Kamuran Tanhan destnîşan kir ku heta ew neçin cenazeyan nestînin wê li wir bin û wiha dirêjî da axaftina xwe: “Banga me ji rayedaran re ev e; heke biçek hiqûq mabe bila astengiyan dernexînin. Ev çend roj in zilma ku li ser her du malbatan tê kirin di tu bawerî û siyasete de nîne. Daxwaza me jî ew e ku bihêlin malbat biçin cenazeyên xwe bînin û bikarin wan defin bikin û biçin ser gora zarokên xwe. Xwestin me ji odeya ku em lê diman derxînin lê me ew nêzikatî qebûl nekir. Armanca wan ew e ku me derxînin dervêyî sînor. Lê me nehişt û piştî berteka me bi paş ve gav avêtin. Malbat jî dibêjin heta ku em encameke nestînin ji vê qade dernakevin, me bikujin jî binçav jî bikin em dixwazin biçin cenazeyên xwe bînin.”
