Li navçeya Silopiya Şirnexê ji bo şermezarkirina kuştina jina ciwan Gulîzar Yildiz meşeke girseyî hat lidarxistin.
Parlamenterên DEM Partiyê Berîtan Guneş û George Aslan, Hevşaredara Bajarê Mezin a Mêrdînê Devrîm Demîr, endamên TJAyê yên Mêrdîn, Sêrt û Şirnexê, rêveberên DEM Partî û DBPê yên Botanê, dayikên aştiyê, hilbijartiyên herêma Botanê, endamên ÎHDê, Baroya Şirnexê, KESK, DÎSK, bi sedan welatî û malbata Yildiz tevlî meşa ji aliyê TJAyê ve hatiye organîzekirin bûn. Girseya ku li kolana hunerê kom bûn bi pankarta, “Qetlîama li ser jinê polîtîk e’ heya kuçeya 2yemîn meşiyan.
Piştî meşê Hevseroka ÎHDê ya Şirnexê Esîn Yilmaz daxuyanî xwend û got ku Gulîzar Yildiz ne ya yekemîn e, vaye bi salan e li Şirnexê ji aliyê dewlet û mêran ve jin tên qetilkirin û wiha berdewam kir: “Ji sala 2016an ve hem ji aliyê hêzên dewletê ve hem jî ji aliyê mêran ve jin tên qetilkirin. Pakîze, Sêvê û Fatma ji aliyê leşkerên dewletê ve, Sakîne Kulter ji aliyê serokê saziyek a dewletê ve Taybet Înan ji aliyê polîsên tirk ve û îro jî Gulîzar Yildiz ji aliyê zihniyeta mêr ve hate kuştin.”
Yilmaz di dawiya axaftina xwe de bi lêv kir ku êdî kêr gihîştiye hestî û axaftina xwe wiha bi dawî kir; “Em hemû êşa ew kêra li bedena Gulîzar ketiye dikêşin. Me bi dehan caran got Hevpeymana Stenbolê ji meriyetê ranekin lê çavan nedît û guhan nebihîst. Ev bûyerên tên jiyîn bingeha xwe ji wir digirin. Ji bo jiyana jinan were parastin divê cezayê herî giran li kujerên jinan were birin. Em hemû Gulîzar in.”
Piştre endama TJAyê Adalet Fîdan jî ev tişt anî ziman: “Mixabin îro jî em ji bo tundiyek li ser jinê, ji bo kuştina jinekî meşiyan. Şêwaza qetilkirina Gulîzar şêwazek DAIŞî bû, em vê şêwazê şermezar dikin.”
Parlamentera DEM Partiyê ya Mêrdînê Berîtan Guneş anî ziman ku îro êşa wan Gulîzar e û ev tişt bi lêv kir: “Îro êşa me Gulîzar e, sedema kuştina jinan ji ber berxwedana jina azad e. Roj tuneye ku li herêmê tundiya li ser jinê pêk neyê. Her roj jinek li hundirê mala xwe, li kolanê, li kar rastî êrîşî tên. Ji bo pêşîgirtina vê tundiyê êdî dema raperîna jinan e. Çawa li Rojava me pêşberî rastiya DAIŞê li ber xwe da îro em ê li vir jî li ber xwe bidin. Pêkanîna tundiya li ser jinê tiştek pergalî û ev yek bi destê dewletî jî pêk tê. Heya ku em li vir bin em ê li hember kuştina jinan li ber xwe bidin.”
Di dawiya axaftinan de dayik û xwişka Gulîzar Yildiz jî axaftin kirin û gotin ku ji bo kuker cezayê herî zêde wergire ew ê heya dawiyê li pey şopa doza Gulîzar bin.
Piştî axaftinê girse bi dirûşmeya, ‘Jin jiyan azadî’ belav bû.
