Di civînên TJAyê yên li sê taxên Wanê hatine lidarxistin de, hate tekezkirin ku jin di avakirina pêvajoyê de roleke pêşeng lîstine.
Tevgera Jinên Azad (TJA) di çarçoveya banga ji bo “Aştî û Civaka Demokratîk” de li taxên Seyrantepe û Eminpaşa yên Wanê, Karşiyaka, civînek jinan li dar xist. Li gel çalakvanên TJAyê, gelek jin beşdarî civînan bûn.
Berîvan Tibelik di civînê de axivî û behsa pêvajoya ku di 27ê Sibatê de dest pê kir kir û diyar kir ku ew pêvajoyek dijwar bû. Berîvan Tibelik bi bîr xist ku gelê Kurd bi salan e rastî polîtîkayên înkar û îmhayê tê û got, “Gundên gelê Kurd hatin şewitandin, hatin sirgûnkirin, ji gundên xwe koçî bajaran kirin û li wir zehmetiyên aborî yên girîng kişandin. Li hember van zehmetiyan, gelek kes tevlî PKKê bûn, ji zarokan bigire heya extiyaran gelek kes hatin girtin û wekî ku em hemî dizanin, rêberê gelê kurd 27 sal in li Îmraliyê girtî ye. Lê tevî van hemû zehmetiyan jî, gelê Kurd dev jê berneda û îro pêvajoyek nû dest pê kiriye. Di dawiya van hemûyan de, dewlet jî neçar ma ku li aştiyê bigere. Birêz Abdullah Ocalan jî got ku jin di avakirina vê pêvajoyê de rolek pêşeng dilîzin. Em ji bo vê armancê civînan li dar dixin.”
Piştre Aynur Sarica ji Kovara Jineoloji axivî û tekez kir ku gelê Kurd bi salan e di têkoşînekê de ye. Aynur Sarica got, “Carinan, êrîşên li dijî me ewqas zêde bûne ku em nikarin cilên xwe yên neteweyî li xwe bikin. Dewletên neteweyî dixwestin me bêdeng û bêax bihêlin. Armanca damezrandina PKKê ew bû ku gelê kurd bi cîhanê bide nasîn û nasnameya wan were naskirin. Di vê têkoşînê de bêhejmar kesan jiyana xwe ji dest dane. Li çiya, gund û bajaran li dijî gelê kurd polîtîkayên cûda hatin meşandin. Bi polîtîkayên şerê taybet di her aliyê jiyana me de destwerdan li me hat kirin. Gihiştin wê astê ku ew bi xwe nekarîn ji rewşê birevin û neçar man ku bi Birêz Ocalan re hevdîtin bikin. Me dizanibû ku ew ê neçar bimînin ku bi Birêz Abdullah Ocalan re hevdîtin bikin. Û di dawiyê de ev yek qewim.”
Piştî axaftinan civînan bi pirs, bersiv û sohbetê dewam kir.
