Di peyamên ji Rojava û Rojhilatê Kurdistanê ji bo Konferansa Kurdên Bakur Yekîtiya Xwe ya Neteweyî Nîqaş dikin re hatî şandin de banga xurtkirina yekîtiyê hate kirin. Di peyaman de hate destnîşankirin ku destkeftiyên heyî tenê bi yekîtiya neteweyî dikarin werin parastin û misogerkirin.
Di Konferansa Kurdên Bakur Yekîtiya Xwe ya Neteweyî Nîqaş Dikin de peyamen ji Rojhilat û Rojavayê Kurdistanê hatine şandin, hatin xwendin. Hevseroka Daîreya Têkiliyên Derve ya Rêveberiya Xweser a Bakur û Rojhilatê Sûriyeyê Îlham Ehmed di peyama ku ji konferansê re şand de, destnîşan kir ku cihêrengiya fikran ne sedema perçebûnê, lê berovajî dewlemendiyek e.
‘Nêrînên cuda dewlemenî ne’
Îlham Ehmed di peyama xwe de balkişand ser pêşketina di aliyê yekîtiya neteweyî de û wiha got: “Tevî hemû zehmetiyên ku di dîroka Kurdan de hatine jiyîn, demên dawî nîşan dan ku cudahiyên fikir û nêrînan nebûne sedema perçebûnê. Berovajî vê yekê, ev dewlemendiyek e. Li hemberî êrişan, yekîtiya gelê Kurd û gelên din gelekî girîng e. Çi astengî derkevin pêşiya me jî, divê em wan derbas bikin. Em yekîtiya neteweyî ji dirûşmeyê derdixin û dixin pratîkê. Di vê xalê de me li Rojavayê Kurdistanê konferansek li dar xist, piştî danûstandinên bi salan me yekîtiya xwe ava kir. Ji bo ku Kurd li Sûriyeyê bigihêjin mafên xwe û bibin aliyekî çareseriyê, ev helwest pêwîst e. Li Bakurê Kurdistanê jî gelê Kurd daxwaza yekîtiyê dike.”
‘Qonaxa hişyariya siyasî û yekrêziyê ye’
Li ser navê Dîplomasiya KJARê Şîyan Horam jî di peyama xwe de balkişand ser dîzayna nû ya Rojhilata Navîn û rola yekîtiya gelê Kurd di vê pêvajoyê de. Horam ev nirxandin kirin:
“Di vê qonaxê de ku Rojhilata Navîn ji nû ve tê dîzaynkirin, yekrêzî û yekîtiya gelê Kurd mijara herî jiyanî ye. Hêzên statukoparêz xwestin nasname û dîroka gelê Kurd binax bikin, lê têkoşîna me ya giranbiha hem bi pratîk hem jî bi teorî ev dîrok parast û gihand asta projeya Neteweya Demokratîk. Ev destkeftî bi pêşengiya jinên Kurd û şoreşgeran hatine afirandin. Ev qonax, qonaxeke hesas û ya hişyariya siyasî ye. Ji bo em bikaribin van destkeftiyan biparêzin, ruhê yekîtî û yekrêziyê pêwîst e. Êrişên li ser Kurdistanê, êrişên li ser hemû neteweyên din in jî; lewma divê em bi yekdengî li hemberî van êrişan bisekinin.
Projeya Neteweya Demokratîk a ku bi pêşengiya Rêber Apo û têkoşîna nîv sedsalî ya Tevgera Azadiyê hatiye afirandin, îro zemînek e ku hemû gel dikarin bi hev re lê bijîn. Projeya civaka aştî û demokratîk tenê bi yekîtî û yekrêziyê serdikeve. Em vê konferansê li mîmarê azadiyê û li hemû têkoşerên azadiyê pîroz dikin.”
