Bi hezaran karker û kedkarên ku beşdarî mitînga 1ê Gulanê ya li Qada Gundogdu ya Îzmîrê bûn, bi yek dengî qêriyan ku ew ê keda xwe û mafên xwe ji destê kedxwaran xelas bikin.
Mitînga 1ê Gulanê ku ji aliyê Komîteya Amadekar a 1ê Gulanê ya Îzmîrê ve hatibû organîzekirin, li Qada Gundogdu ya Konakê birêve çû. Girseya gel ji sê milan ve ji Qada Basmaneyê, Qada Cumhuriyetê û ji ber Bendera Alsancakê ber bi qadê ve meşiya. Di meşê de pankartên wekî “Karker bibin yek, ev pergal dê biguhere”, “Di pergala xerab de çerxa saxlem nabe”, “Xwediyên rastîn ên bajêr ber bi 1ê Gulanê ve dimeşin”û “Ji bo ked, edalet, wekhevî, aştî û azadiyê em li qadan e” hatin hilgirtin.
Di dema meşê de gelek caran “Serkeftin dê bibe ya kedkarên berxwedêr” û “Bijî Berxwedana Karkeran” li asîmanên Îzmîrê deng vedan.
Ji bilî sendîka û partiyên siyasî; rêxistinên jinan û saziyên mafên mirovan jî bi rengên xwe beşdarî mitîngê bûn. Piştî axaftinên destpêkê, li ser navê karkerên Temel Contayê ku 508 roj in, ji bo mafên sendîkayî di grevê de ne, Sînem Kaya û karkerên Digel Tekstîlê axivîn.
‘Kes ne bi tenê ye’
Li ser navê Komîteya Amadekar, Nûnerê Herêma Egeyê ya DÎSKê Denîz Gumuştekîn axivî û diyar kir ku ew ji bo eşkere kirina rûyê rastîn yê vê pergalê û ji bo guhertina wê li qadê ne. Denîz Gumuştekîn bal kişand ser xizaniya karkeran û got: “Dewlemend dewlementir bûn, kedkar jî her ku çû feqîrtir bûn. Barê bacê ma ser milê karker û karmendan. Kesên teqawid bûyî li bazaran mecbûrî bermahiyên fêkiyan hatin kirin. Jin di nava çerxa tundiyê de hatin hiştin. Peymana Stenbolê hat betalkirin û canê jinan bêewlehî ma. Lê bila her kes zanibe; kes ne bi tenê ye! Jiyaneke bêyî tundî û wekhev, mafê me ye.”
‘Em ê siberoja xwe ava bikin’
Denîz Gumuştekîn destnîşan kir ku ev pergal xwezayê jî talan dike û ev yek anî ziman: “Ji bo rantê qadên jiyanê tune dikin. Gelê me yê ku ji gund û warên xwe tê derxistin, berxwedana xwe mezin dikin. Em welatekî wusa dixwazin ku ked neyê xwarin, tenduristî û perwerde ji bo her kesî be û edalet serwer be. Siberoja vî welatî em ê bi destên xwe ava bikin.”
Mitînga bi heybet, piştî axaftinan bi konsera hunermend Selda Bagcan bi dawî bû.
