Platforma Ked û Demokrasiyê ya Êlihê têkildarî êrişên li ser Rojavayê Kurdistanê û taxên Helebê daxuyanî da û got: “Em bang li Neteweyên Yekbûyî dikin ku bi lezgînî mudaxileyî êriş û komkujiyên ji aliyê Hikûmeta Demkî ya Sûriyeyê û Artêşa Sûriyeyê ve tên kirin, bike.”
Platforma Ked û Demokrasiyê ya Êlihê ku ji gelek saziyan pêk tê bi boneya şermezarkirina êrişên li ser taxên Şêxmexsûd, Eşrefiyê û Benî Zêd ên Helebê hatin kirin û êrişên li Rojava pêk tên, li Parka Yilmaz Guney daxuyanî da çapemeniyê. Di daxuyaniyê de nûner û rêveberên DEM Partiyê, DBPê, TJAyê MEBYA-DER, Egîtîm Sen, ÎHD, OHD, ARÎ-DER, Navenda Çanda Biharê û gelek endamên saziyên sivîl beşdarî daxuyaniyê bûn. Di çalakiyê de parkarta “Bila komkujî bên rawestandin û hiqûqa navneteweyî pêk bê” hat hilgirtin. Girseyê diruşmeya “Bijî berxwedana Rojava” berz kir. Metna daxuyaniyê jî ji aliyê Hevserokê ÎHDa Êlihê Ahmet Şîray ve hate xwendin.
‘Sûcê şer li Helebê pêk hat’
Ahmet Şîray di destpêka axaftina xwe de diyar kir ku Neteweyên Yekbûyî ji bo pêşîlêgirtina şer û êrişên li ser Rojava divê bikeve nava tevgerê û got: “Mixabin li herêmên ku şer û pevçûn lê belav bûne, em dibînin ku hewldanên Neteweyên Yekbûyî yên ji bo aştiyê têrê nakin. Wekî parêzvanên mafên mirovan, em êrişên şermezar dikin û naxwazin mafên mirovan werin binpêkirin. Em êrişên çekdarên girêdayî Hikûmeta Demkî ya Sûriyeyê û Artêşa Sûriyeyê wekî sûcê şer pênase dikin. Li dijî taxên Kurdan ên Helebê û kêmneteweyên li Sûriyeyê êrişên li dijî mirovahiyê têne kirin. Peymana Neteweyên Yekbûyî ya li ser Qanûnên Şer ji aliyê Dewleta Sûriyeyê ve bi eşkereyî tê binpêkirin. Di van şer û pevçûnan de bi taybetî sivîlan hedef digirin. Êrişên vê dawiyê yên li dijî sivîlan û nexweşxaneyên li Helebê bi eşkereyî binpêkirina mafên mirovan raxistin ber çavan û sûcên giran li dijî mirovahiyê pêk anîn. Ji ber vê yekê em bang li Neteweyên Yekbûyî dikin ku bi lezgînî mudaxileyî êriş û komkujiyên ji aliyê Hikûmeta Demkî ya Sûriyeyê û Artêşa Sûriyeyê ve tên kirin bike. Divê Neteweyên Yekbûyî bi awayekî wekhev nêzî hemû şer û pevçûnên li herêmê tê kirin bibe û li dijî hemû êriş û şeran dengê xwe bilind bike. Em bang li Neteweyên Yekbûyî dikin ku erka xwe ya sereke bicih bîne û daxwaza aştiyê ya ku tê kirin bibihîze.”
Piştî daxuyaniyê pêkhateyên Platformê çûn PTTê û nameyên ku 30 saziyan di nava xwe de amade kiribûn ji Neteweyên Yekbûyî re şandin.
