Stenbol – Komîsyona Girtîgehan a Şaxa ÎHDa Stenbolê balê kişand ser rewşa girtiyê nexweş Osman Kara yê ku 63 salî û xwest Osman Kara demildest were berdan û dermankirin.
Komîsyona Girtîgehan a Şaxa Komeleya Mafên Mirovan (ÎHD) a Stenbolê çalakiya “Rûniştina Fyê” ya 745emîn a du hefteyan carekê de pêk tîne, li pêşiya avahiya komeleya xwe ya li navçeya Beyoglûyê li dar xist. Aktivîstên mafên mirovan, malbatên girtiyan û nûnerên rêxistinên siyasî û sivîl tev li çalakiyê bûn. Parêzvanên mafên mirovan di çalakiya vê hefteyê de bal kişandin ser rewşa girtiyê nexweş Osman Kara yê ku hê di Girtîgeha Hejmar 2yemîn a Tîpa L ya Marmarayê tê ragirtin. Di çalakiyê de pankertên “Dermankirin maf e, nayê astengkirin” û “Bila girtiyê nexweş Bûrhan Osman Kara bê berdan” hatin vekirin û wêneyên girtiyên nexweş hatin hilgirtin. Metna daxuyaniyê ji aliyê endamê ÎHDê Turker Demîrcî xwend.
‘Her ku diçe Osman Kara zeîf dibe’
Turker Demîrcî diyar kir ku divê girtiyê nexweş Osman Kara werê berdan û got: “Her ku diçe, rewşa girtiyên nexweş ber bi xerabûnê ve diçe. Em di hefteya 745emîn de rewşa Osman Kara yê ku hê di Girtîgeha Hejmar 2yemîn a Tîpa L ya Marmarayê tê ragirtin dipirsin. Osman Kara 63 salî ye û nexweşiyên wî KOAH, diyabet, tansiyon û nexweşiya Myastenia Gravisê heye. Bi sedema van nexweşiyan Osman Kara bi zehmetî bêhn digire, zehmetiya axaftinê û êşa laş dikişine. Osman Kara ji bo jiyana xwe bi awayekî asayî bijî divê bê dermankirin. Kurê Osman Kara derbarê rewşa bavê xwe de ev agahî parve kir; ‘Bi hincetên bêîdia bavê min di 3yê Sibata 2026an de binçav kirin û girtin. Berî werê girtin li Nexweşiya Bajêr a Edeneyê dihat dermankirin û nexweşiya Myestenia Gravis hatibû teşhîskirin. Ji bo nexweşiya Myestenia Gravis divê tedawiyek baş were meşandin û her 10 rojan carekî xwîn jê bê girtin. Bi sedema pêş ketina nexweşiyê bavê min her ku diçe zeîf dibe.’ Her ku diçe jiyana Osman Kara dikevê di bin xeteriyê. Divê demildest Osman Kara were berdan û dermankirin.”
