Hevşaredarê Bajarê Mezin ê Wanê Abdullah Zeydan di çalakiya protestokirina qeyûm de axivî û ev yek anî ziman: “Bi anîna 10 hezar leşker û polîs, bi ço û bombeyên gazê hûn nikarin vîna gelê me desteser bikin.”
Çalakiyên protestokirina tayînkirina qeyûm a li Şaredariya Bajarê Mezin a Wanê di roja sêyemîn de berdewam dikin. Bi tevlibûna Hevseroka Giştî ya Partiya Herêmên Demokratîk (DBP) Çîgdem Kiliçgun Uçar, parlamenterên DEM Partiyê, nûner û rêveberên gelek partiyên siyasî û bi sedan welatiyan li Parka Feqiyê Teyran kom bûn û daxuyanî dan. Beriya daxuyaniyê bi sedan kes hatin parkê û dirûşmên “Gelê Wanê li vir e, qeyûm li ku ye?”, “Qeyûmê dizek ji Kurdistanê bicehime” û “Qeyûm talan e berxwedan jiyan e” berz kirin.
‘Gelê Wanê bersiv dide êrişkaran’
Hevşaredarê Bajarê Mezin ê Wanê Abdullah Zeydan di daxuyaniyê de axivî û wiha got: “Gelê Wanê bi roja ye bersiveke dîrokî dide kesên êrişî hiqûq û edaletê dikin. Hilbijartinên 31ê Adarê bersiveke dîrokî bûn. Ev rêberiya qeyûm, hewl dide dîsa çav berdaye vîna gel. Lê bila bizanin ku dê gelê me destûrê nede wan. Her qeyûm dê weke dizê îradeyê di dîrokê de cih bigire.”
‘Wê ev dizek biçin û gelê me bi ser bikeve’
Abdullah Zeydan diyar kir ku zîhniyeta qeyûm dixwaze îradeya gel tune bihesibîne û nelirêtiyên xwe bidomîne û wiha domand: “Dixwazin pergala nelirêtiyê bidomînin. Lê em li vir soz didin ku dawiya qeyûm û dizan hatiye. Hûn nikarin bi anîna deh hezar polîs û leşker, bi ço û bombeyan îradeya gelê me desteser bikin. Yên ku îradeya gel dizîn, niha li ser sergoya dîrokê ne. Hûn jî dê biçin wir. Qeyûm û dizek wê dîsa têk biçin û gelê Wanê dîsa bi ser bikeve. Em ê heta dawiyê xwedî li îradeya gelê xwe derkevin.”
Ocalan firsenda dîrokî pêşkêş kiriye
Hevseroka Giştî ya DBPê Çîgdem Kiliçgun Uçar jî axivî û bal kişand ser polîtîkayên qeyûm û desteserkirina îradeya gelê Kurd û destnîşan kir ku Rêberê PKKê Abdullah Ocalan ji bo Tirkiyeyê firsendek dîrokî pêşkêş kiriye û divê ev pêvajo nebe qurbanê tayînkirina qeyûman.
