Colemêrg – Hevserokê Rêxistina DEM Partiyê ya Colemêrgê Behçet Kanat derbarê hezaza li ser rêya Colemêrg-Wanê pêk hat de destnîşan kir ku girtina rê encama polîtîkayên cihêkariyê ya li ser Colemêrgê ye.
Rêya Colemêrg û Wanê ji ber hezaz û ketina aşûtê ji 11ê Nîsanê ve heta niha girtî ye. Sê hefte ye bi ser bûyerê re derbas bûye lê hê jî rê ji bo çûnehatê nehatiye vekirin. Xelkê herêmê mexdûr bûye û destnîşan dikin ku kes li hawara wan nehatiye û vê yekê bi polîtîkayên cihêkariyê ve girê didin. Xelkê hêrêmê li dijî vê xemsariya saziyên dewletê û desthilatê bi hêrs û aciz e.
Hevserokê Rêxistina DEM Partiyê ya Bajêr a Colemêrgê Behçet Kanat derbarê xemsariya li ser Colemêrgê de ji ajansa me re axivî û peşniyara rêya alternatîf a rêya Berçelanê kir û got ku ew rê ji bo Wanê gelek nêzîktir û çêtir e.
‘Çav û guhên xwe jê re girtin’
Behçet Kanat diyar kir ku hilweşîna rêya li Colemêrgê her çend ji ber baran û berfa zêde be jî lê sedema pêşî tesîsa li wir hatiye avakirinê ye û wiha got: “Li wê derê çopeke zêde hatibû komkirin û ew çop bin rê de hat berhevkirin. Ji ber gaza metanê ya ku di bin axê de civiyaye û barîna zêde ya baranê, teqînek pêk hatiye û rê rûxiyaye. Raporên ÇEDê li ber destê wan hebûn, lê bi zanebûn çav û guhên xwe girtin.”
‘Polîtîkayên cihêkariyê li ser Colemêrgê ne’
Behçet Kanat bal kişand ser polîtîkayên cihêkariyê yên li ser Colemêrgê û axiftina xwe wiha berdewam kir: “Hûn herin Rêya Bolûyê an jî Rehra Reş, hûn ê bibînin ku li cihên bi heman bilindahiyê tunelên mezin û pirên modern hatine çêkirin. Lê dema mijar dibe Colemêrg guh û çav tên girtin. Ev nîşan dide ku piştî hilbijartinê ev e ji bo welatiyên Colemêrgê cezakirin e.”
‘Rêya Berçelanê çareserî ye’
Behçet Kanat diyar kir ku rêya alternatîf a di Berçelanê de derbas dibe û wiha got: “Di sala 2006an de ev rê hate vekirin, ev rê ji bo çûna Wanê gelek nêzîktir e, lê paşê bi hêcetên berf zêde dibare hate girtin. Îro teknîk gihîştiye wê astê ku mirov dikare tûnelên 15 kîlometreyî çêbike. Heke niyet hebe, ev rê di demeke kurt de dikare were çêkirin. Lê dixwazin gelê Colemêrgê her tim di nava zehmetiyan de bimîne.”
‘Tenê propgandayê dikin’
Behçet Kanat dîmenên ku di medyayê de weke ku “xebatên rê” tên nîşandan ji bilî propgandayê ne tiştekî din e û got: “Ev makîneyên ku hûn dibînin, ne ji bo çêkirina rêya miletê ye. Ev xebatên fîrmayeke petrolê ne. Em bang li desthilatê dikin; rêya Berçelanê ya ku mafê vî gelî ye, bila were vekirin.”
