Hevşaredarên Wanê Abdullah Zeydan û Neslîhan Şedal piştî biryara dadgehê li ber şaredariyê daxuyanî dan. Hevşaredaran bal kişandin ser biryara dadgehê û banga xwedî derketina li îradeya xwe li gelê Wanê kirin.
Danişîna 8emîn a doza Hevşaredarê Bajarê Mezin ê Wanê Abdullah Zeydan ku bi îdiaya “Alîkarî daye rêxistinê” tê darizandin, li 5emîn Dadgeha Cezayên Giran a Amedê hat lidarxistin û dadgehê 3 sal 9 meh cezayê hepsê li Zeydan birî. Piştî biryarê bi hezaran welatî li ber Şaredariya Bajarê Mezin a Wanê kom bûn û biryara dadgehê bi dirûşmên “Zeydan û Şedal vîna me ne” protesto kirin.
Bi beşdariya hevşaredar Neslîhan Şedal û Abdullah Zeydan, parlementer û rêveberên DEM Partiyê yên Wanê, rêveberên DBPê û bi hezaran welatiyan li ber şaredariyê daxuyanî hat dayîn.
Ewilî hevserokê DEM Partiyê yê Wanê Veysî Dîlekçî axivî û biryara hatiye dayîn weke biryareke siyasî pênase kir. Veysî Dîlekçî bertek nîşanî desteserkirina vîna gel da û got: “Em bang li gelê Wanê, Gelên Kurdistanê û Tirkiyeyê dikim ku li dijî desteserkirina vîna gel bêdeng nemînin.”
Zeydan: Xwedî li vîna xwe derbikevin
Hevşaredar Abdullah Zeydan axivî û bal kişand ser biryara dadgehê. Abdullah Zeydan anî ziman ku ti hukmê vê biryarê nîn e û wiha got: “Li Tirkiyeyê edalet, hiqûq, destûra bingehîn nîn in. Tenê darazek ku hemû daxwazên desthilatê pêk tîne heye. Em dizanin ku ev dozên ji bo me tên vekirin, hemû li gorî talîmatên siyasî ne. Şerm jî nakin, dixwazin vîna gelê Wanê desteser bikin. Ev kesên ku şerm û fedî nakin ji berxwedana 31ê Adarê jî ders negirtin e. Em weke gelê Wanê ku baweriya me bi demokrasiyê, hiqûqê, edaletê, vîna gel heye, em ê vîna xwe û edaletê biparêzin. Kesên ku li rantê digerin kefa destên xwe dixwirînin û li dû desteserkirina vîna milyonek û 200 hezar welatiyên Wanê ne. Lê bila neyê jibîrkirin ku ev bêhiqûqiya îro tê serê me, wê sibê bê serê we jî. Lewma em li bendê ne ku 85 milyon li kêleka demokrasî û edaletê bin. Em bang li hemû gelên xwe dikin ku xwedî li vîna xwe derbikevin.”
Şedal: AKP hînî desteserkirin û talanê bûye
Dû re hevşaredar Neslîhan Şedal jî diyar kir ku desthilata AKPê ji mêtina xwîna Kurdan têr nabe û got: “AKP li ser xwîna Kurdan, li ser destkeftiyên Kurdan, li ser vîna Kurdan bêhnê digire û xwe li ser van polîtîkayên qirêj li ser pêyan digire. Li ti derê cîhanê gotina aştiyê sûc nîn e, lê di exlaqê AKPê de şer heye, desteserkirin û talankirin heye. Qirkirinek mezin li ser Kurdan tê meşandin û rêberê Kurdan hê jî di bin tecrîdê de ye. Li dijî hemû kiryar û polîtîkayên we em hêj jî li vir in û li ber xwe didin. Em morala xwe xerab nakin. Her roj destkeftiyên me zêde dibin. Yê ku winda bike AKP ye. Îro dîsa dixwazin vîna gelê Kurd desteser bikin, lê em ê nehêlin ku vîna me were desteserkirin. Wê gelê Wanê û ciwanên xwedî li vîna xwe derkevin.”
Piştî daxuyaniyê xelkê Wanê li şaredariyê de dest bi nobetê kir. Xelkê Wanê tê ber şaredariyê û xwedî li vîna xwe derdikevin.
