Amed – Parêzerên ku çûn serdana girtiyên li Girtîgeha Dûmlû ya Erziromê binpêkirinên mafan ên li dijî girtiyan tên kirin vegotin û dan zanîn ku ji ber girtî li dijî binpêkirinên tên kirin xwedî li mafên xwe derdikevin bi mûameleyeke nebaş re rû bi rû dimînin.
Zext û binpêkirinên mafan ên li dijî girtiyên siyasî yên li girtîgehên Tirkiyeyê û bakurê Kurdistanê roj bi roj zêde dibin. Yek ji van girtîgehan jî Girtîgeha Ewlehiya Bilind a Hejmara 2yan a Dûmlû ya Erziromê ye. Parêzerên ku çûn serdana girtiyan kirin û malbatên girtiyên bi navê Cîhan Gokalp û Oktay Gul ku bi wan re bi telefonê axivîn binpêkirinên mafan ên li girtîgehê tên pêkanîn vegotin.
Bi pêkanînan hewl bidin girtiyan biçewisînin
Parêzerên Şaxa Komeleya Hiqûqnasên Ji Bo Azadiyê (OHD) di 24ê Kanûnê de serdana girtîgehê kirin û bi çend girtiyan re hevdîtin kirin. Parêzeran diyar kirin ku li girtîgehê pêkanîna tecrîd û îzolasyonê heye û ev agahî dan: “Girtiyan ji hevdû vediqetînin û dibin qawişên dûr. Rêveberiya girtîgehê sansurê li pirtûkan dike, şîrên ku dîroka wan derbas bûye didin girtiyan, beşeke qawişên girtiyan tavê jî nabînin, korîdorên ku qawişên girtiyan lê ne di nava qirêjiyê de ne, ava daşirê tê qawişên wan, boyaxê dîwaran diwere, li odeyan ritûbet heye, li ber paceyan têlên fesê hene, cihê hewadariyê gelek xerab e, ji bo ku qawiş tên paqijkirin derbarê girtiyan de lêpirsînên dîsiplînê tên destpêkirin. Xwarinên didin wan gelek nebaş in û nayên xwarin, armanca dayîna van xwarinan ew e ku girtiyan biçewisînin. Di hevdîtinên girtiyan ên bi midûrî re weke ku girtî di dadgehê de ne parastina li ser piyan li wan tê ferzkirin. Saetên hevdîtinan ên malbatên ku ji derveyî bajar tên bi awayekî zanebûn digirin saetên serê sibê û dixwazin malbatan aciz bikin.”
Parêzeran dan zanîn ku ji ber girtî li dijî binpêkirinên tên kirin mafê xwe yê îtîraz, gilî kirin û protestoyê bikartînin rastî mûameleyeke nebaş tên kirin û derbarê wan de lêpirsînên dîsiplînê tên destpêkirin.
‘Rêveberiya girtîgehê bi awayekî cidî nêzîk nabe’
Bavê girtiyê bi navê Cîhan Gokalp, Îzzettîn Gokalp jî da zanîn ku lawê wî di 20ê Kanûnê de bi wan re bi telefonê axiviye û binpêkirinên mafan ên li girtîgehê lê tê ragirtin vegotine. Îzzettîn Gokalp diyar kir ku zextên li ser girtiyan zêde bûne û wiha got: “Her çiqas pirsgirêkên heyî bi rêveberiya girtîgehê re tên parvekirin jî rêveberî bi awayekî cidî nêzî van pirsgirêkan nabe. Zextên li ser zarokên me berdewam dikin. Lazim e rojê 8 saetan derxînin cihê hewadariyê lê hin girtiyan 2 saetan derdixînin.”
‘Tevî pêvajoyê jî zextên li girtîgehan berdewam dikin’
Îzzettîn Gokalp xwest ku sazî û dezgehên bi girtîgehan re eleqedar peywîra xwe pêk bînin û wiha domand: “Divê berspiryar xwedî li zarokên me derkevin. Em dixwazin ev pirsgirêkên zarokên me bên çareserkirin. Tevî ku pevajo jî heye ev zext berdewam dikin. Şûna ku ev zext kêm bibin zêdetir dibin. Em dixwazin çapemenî jî li ser van pirsgirêkan bisekine û bikin rojev.” Îzzettîn Gokalp da zanîn ku ji bo pirsgirêkên ku kurê wî jê re vegotine serî li Şaxa Komeleya Mafên Mirovan (ÎHD) û Federasyona Komaleyên Hiqûq û Piştevaniyê ya Malbatên Girtî û Hukumxwaran a Medê (MED TUHAD-FED) dane.
Pêkanînan berdewam bikin dê bikevin çalakiyan
Girtiyê bi navê Oktay Gul ku di 20ê Kanûnê de bi telefonê li malbata xwe geriya û binpêkirinên li girtîgehê ragihandin. Oktay Gul diyar kir ku girtiyên ku di hucreya yek kesî de tên ragirtin dernaxînin cihê hewadariyê û da zanîn ku rast û dirûst xwarinê nadin wan. Oktay Gul bi lêv kir ku gelek zext û zorê li wan dikin û wiha got: “Tundiya fizîkî û psîkolojîk dikin. Heke van pêkanînan berdewam bikin em ê bikevin çalakiya greva birçîbûnê û mafê xwe yê axaftina bi telefonê bikarnaînin.” Oktay Gul anî ziman ku zext li girtiyên ku bi navên Levent Geçîcî, Îbrahîm Toktaş, Bedredtîn Adiguzel, Cengîz Albayrak û Saît Ozturk jî tê kirin û ew jî dê li dijî binpêkirinan bikevin çalakiyan.
