Êlih – Rêveberên Navenda Çandê ya Baharê ya Êlihê diyar kirin ku ew bi salan e li saziya xwe dersên hunerî didin şagirtan û wan li vir gelek şagirt mezûn kirin e û gotin: “Gelek zarokên ku bi zimanê Kurdî nizanin tên li vir fêrî zimanê xwe jî dibin.”
Navenda Çandê ya Baharê ya Êlihê ku ji sala 2000î vir ve hatiye vekirin, bênavber kar û xebatên xwe yên çand û hunerî didomîne. Li vir di gelek beşan de dersên cûr bi cûr yên weke gîtar, tembûr, keman, erbane, xêzkirina resman, şano, govend û hwd. perwerde tên dayîn. Her wiha zarokên ku temenê wan ji 7 heta 14 salî tên li vir dersên hunerî dibînin, dersên wan jî ji 3 polan pêk tê. Di her polekê de dersên cuda tên dayîn û ew dersên hunerî gelekî bala wan dikişîne ser xwe.
Rêveberên Navenda Çandê ya Baharê ya Êlihê Çîçek Çelîk û Serhat Hêvî têkildarî kar û xebatên xwe ji Ajansa Welat re axivîn.
Çîçek Çelîk diyar kir ku diyar kir ku gel eleqeyeke mezin nîşanî saziya wan dide û wiha got: “Ji aliyê amûran ve hemû beşên me yên dersan hene. Amûrên me yên weke tembûr, gîtar, piyano, wêne, şano û keman hene. Perwerdeyên me li gorî van amûran têne dayîn. Serlêdanên me baş derbas dibin. Niha jî sê heb polên me yên zarokan hene. Ji bo me ya herî girîng pêşeroja zarokan e. Zarok tên li vir hînî çand, huner û zimanê xwe dibin. Xebatên me bi vî awayî didomin. Em zarokên 7 salî û heta 14 salî li vir perwerde dikin. Ev jî kom bi kom têne kirin û ji aliyê polan ve pirsgirêk tune ye. Van tabloyên ku me li vir daliqandine jî hemû bi destê şagirt û mamosteyên wan hatine xêzkirin. Me xwest ku çavên şagirtên me bi van tabloyan bikevin û bêhtir hêzê jê bigirin. Ev beşên me jî niha zindîne.”
‘Koroya me ya zarokan li çar cihan sahne jî girtin û stran gotin’
Çîçek Çelîk da zanîn ku koma wan a muzîkê jî heye û got ku ew bixwe jî di nav wê komê de cih digire. Çîçek Çelîk axaftina xwe bi van gotinan bi dawî kir: “Li vir gelek şagirtên me perwerde dibin. Hevalên me gelek bernameyan bi hev re amade dikin. Bi vî awayî tevlibûneke xurt heye. Niha koroya zarokan a bi navê Kulîlkên Biharê jî heye û perwerdeyên rîtîm û stranbêjiyê qedandine. Em dixwazin êdî wan fêrî amûran bikin. Bala zarokên li ser kîjan beşan be em wan arasteyî wir dikin. Yên ku dengê wan xweş be em dersên stranbêjiyê didin wan û hwd. Roja yekşemê em dersan di sê polan de didin, jixwe dersên hemû polan di heman rojê de tên dayîn. Em dixwazin zarok bi çand, ziman, huner û stranên xwe mezin bibin. Em lê dinerin roj bi roj zarokên me ji ziman û çanda xwe dûrdikevin. Koroya me ya zarokan li çar cihan sahne jî girtin û stran gotin. Dema ku zarok dertên ser dikê malbatên wan jî dixwazin bên wan temaşe bikin. Bi piranî jî em hevûdu nas dikin. Di vî alîyî de eleqeyeke baş heye û xebatên me bi vî awayî berdewam dikin.”
‘Armanc û xeyalên me yên ji bo xebatên çand û hunerê mezin in’
Serhat Hêvî jî anî ziman ku ew li saziya xwe gelek xebatên giranbûha dikin û wiha qala xebatên xwe kir: “Gelek şagirt tên perwerdekirin û beşên hunerê li vir hatine vekirin. Ligel van tiştan jî êriş li ser saziya me ya çand û hunerê tên kirin. Ligel van êrişan dîsa jî saziya me dest ji karên xwe berneda û karê xwe domand. Armanc û xeyalên me yên ji bo xebatên çand û hunerê mezin in. Her wiha gelek ciwan û şagirt ji vir derketin. Li vir sê çar polên me hene û ders tên dayîn. Di dersên weke gîtar, tembûr, keman, erbane, xêzkirina resman, şano, govend û hwd. de perwerde tê dayîn.”
‘Ev der saziya civaka me ye’
Serhat Hêvî destnîşan kir ku di bin sîwana Navenda Çandê ya Biharê de xebatên gelek pîroz tên kirin û wiha domand: “Armanca me ya sereke ew e ku em civaka xwe û ciwanên xwe bi çand û hunera wan re rû bi rû bihêlin. Da ku çand û hunera xwe nas bikin. Çand û huner ji bo civakê weke pirekê ye. Divê ku em wê pirê careke din ava bikin. Qada çand û hunerê ji bo me gelek binirx û pîroz e. Ya ku mirovan dike mirov jî çand û huner e. Di çavên zarokan û malbatên wan de ev der gelek binirx tê dîtin. Em her tim rûkeniya wan dibînin. Em ji vê rûkeniya wan sûdê werdigirin. Dema ku em perwerde didin zarokan, hêviyên malbatan gelek in. Ev der saziya civaka me ye.”
