Wan – Parlamenterê DEM Partiyê yê Wanê Sînan Çîftyurek ê di daxuyaniya Platforma Ked û Demokrasiyê de axivî wiha got: “Çawa ku gelê kurd li dijî DAÎŞ’ê li ber xwe da û DAÎŞ têk çû, gelê kurd dê dîsa dê li ber xwe bide û ev çeteye dê têk biçin.”
Platforma Ked û Demokrasiyê ya Wanê li dijî tayinkirina qeyûm a li Şaredariya Miksê, li Kolana Hunerê daxuyanî da. Di daxuyaniyê de dirûşmên “Bijî berxwedana gelê kurd” û “Bijî berxwedana Rojava” hatin berzkirin.
Parlamenterê DEM Partiyê yê Wanê Sînan Çîftyurek, Rêxistinên Partiya Wekhevî û Demokrasiyê ya Gelan (DEM Partî) û Partiya Heremên Demokratîk (DBP) ên Wanê, aktîvîstên Tevgera Jinên Azad (TJA) û gelek welatî tev li daxuyaniyê bûn.
Li ser navê platformê metna çapemeniyê ya bi serenavê “Tayînkirina qeyûman pêkanîneke antîdemokratîk e û vîna hilbijêran ji holê radike”
Engîn Işik xwend. Engîn Işik, da zanîn ku tayînkirina qeyûm a li ser Şaredariya Miksê qebûl nakin û wiha got: “Ev biryar ji bo demokrasiya herêmî û vîna gelê kurd xeteriyeke cidî ye. Dûrxistina ji kar a hevşaredarên hatine hilbijartin, mafê temsîliyeta demokratîk a gelan bin pê dike.”
Engîn Işik, da zanîn ku hevşaredaran di pêvajoya namzetiyê de hemû şert û merc bi cih anîne û serî li Lijneya Bilind a Hilbijartinê dane û wiha berdewam kir: “Serlêdanên wan ji aliyê YSK’ê ve hatin qebûlkirin û bûn namzet. Hevşaredar di hilbijartinê de bi vîna gel hatin hilbijartin. Tayînkirina qeyûman pêkanînek antîdemokratîk e û vîna hilbijêran ji holê radike.”
Pişt re parlamenterê DEM Partiyê Sînan Çîftyurek axivî, bal kişand ser şêrê li Rojhilata Navîn û bi lêv kir ku dewletên dagirker ji bo berjewendiyên xwe Rojhilata Navîn kirine gola xwinê û armanc ew e ku Rêveberiya Xweser ji holê rakin. Sînan Çîftyurek wiha berdewamî da axaftina xwe: “Çawa ku gelê kurd li dijî DAÎŞ’ê li ber xwe da û DAÎŞ têk çû, gelê kurd dîsa dê li ber xwe bide û ev çeteye dê têk biçin.”
