Li Cizîrê piştî daxuyaniya ji bo şermezarkirina êrişên li ser Rojava, ciwanan berê xwe da kolanên Cizîrê û li hember êrişên li ser Helebê û Rojava meş li dar xist.
Li navçeya Cizîrê ya Şirnexê ji aliyê Platforma Ked û Demokrasiyê ve li Kolana Hunerê bi tevilbûna Parlamenterê DEM Partiyê yê Şirnexê Mehmet Zekî Îrmez, endam û rêveberên partiyên siyasî û saziyên civakî yên demokratîk û sedan kesî daxuyanî hat dayîn. Di daxuyaniyê de pankarta, “Xwedîderketina li Rojava xwedîderketina mirovahiyê ye” hat vekirin û bênavber dirûşmên, ‘Bijî berxwedana Rojava’ û ‘Rojava Rojhilat e Kurdistan yek welat e’ hatin berzkirin.
Hevserokê Komeleya Mafên Mirovan Şivan Sakman ku daxuyanî xwend got ku êrişên li ser gelê Rojava pêk tên sûcê mirovahiyê ye û wiha axivî: “Em bang li rayedarên herêmê dikin ku li hember van êrşên rawestin. Di van êrişan de sûcê mirovahiyê pêk tê û divê tu kes li hember vê yekê bêdeng nemîne.”
Piştre Parlamenter Mehmet Zekî Îrmez axivî û diyar kir ku kesên êrişî taxên Şêxmeqsûd û Eşrefiyeyê kirine di eslê xwe de çeteyên DAIŞê ne û wiha got: “Hovitiya li Helebê pêk hatî li dijî mirovatiyê ye. Dewleta Tirk îro li Bakur pêvajoyekî dimeşîne ji aliyê din ve bi awayekî vekirî li Rojava hazirtiya şer dikin. Ev yek nayê qebûlkirin.”
Piştî daxuyaniyê ciwanên ku tev li daxuyaniyê bûn berê xwe dan Kolana Orhan Dogan û bi dirûşma, ‘Bijî berxwedana Rojava’ meş li dar xist. Polîsên ku xwe li meşa ciwanan ranegirtin êrişî ciwanan kir. Li ser vê yekê ciwan li kolanên Cizîrê belav bûn û meşa xwe berdewam kirin.
Rojnemegerên êrişa polîsan a li hember gel û ciwanan dişopandin rastî êrişa polîsan hatin û polîsan xwest nûçegihanên Çapemeniya Azad binçav bikin.
Li gor agahiyên hatine bidestxistin herî kêm 3 welatî hatine binçavkirin.
