Li taxa Akpinarê ya Bismilê li dijî hişbirî, fuhûş û çetebûnê meşeke girseyî hat lidarxistin. Hevserokê DEM Partiyê yê Bism8lê Cemîl Tekînoz di çalakiyê de axivî û bang kir ku divê paşeroja ciwanan û civakê bê parastin.
Li taxa Akpinarê ya Bismilê ya Amedê li dijî hişbirî, fuhûş û çetebûnê meşeke girseyî hat lidarxistin. Di meşê de dirûşmeyên ‘Bismil şiyar be xwedî li ciwanên xwe derkeve’, ‘Bijî berxwedana ciwanan’ û ‘Ciwan dimeşe erd û ezman diheje’ hatin berzkirin. Pankart û dovîzên ku li ser ‘Ji hişbirê re na’, ‘Bismil li ciwanên xwe xwedî derkeve’, ‘Hişbir û fihûşê tine bike’, ‘Em tu carî rê nedin we’ hatin nivîsansin hatin gerandin. Hevserokên DBPê yên Bismilê Nerîman Bakir û Reşat Ulug, endamên meclisa Şaredariya Bismilê û bi sedan welatî beşdarî meşê bûn. Di meşê de welatiyan berteka xwe ya li dijî hişbirî, fuhûş û çetebûnê anîn ziman. Piştî meşê, Hevserokê DEM Partiyê Cemîl Tekînoz daxuyanî xwend.
‘Werin em bi hev re xwedî li taxên xwe derkevin’
Di axaftina xwe de Cemîl Tekînoz bal kişand ser girîngiya meşa girseyî û got: “ Îro em li vir ne tenê ji bo ku pirsgirêkekê bînin ziman; em li vir in ku paşeroja zarokên xwe, ciwanên xwe û civaka xwe biparêzin. Têgihîştina civaka demokratîk a ku em wek DEM Partiyê li dijî hişbirî, fihûş û çetebûnê diparêzin; civakeke ku ciwan tê de bi azadî dikarin xwe rêxistin bikin, jin tê de wekhev û azad dijîn, zarok tê de di nava ewlehiyê de mezin dibin, gel û bawerî tê de bi hev re jiyaneke wekhev ava dikin îfade dike. Ji ber vê yekê, em têkoşîna li dijî hişbirî, çetebûn û her cûre pergala mêtingeriyê ya ku rûmeta mirovan dike armanc, wek parçeyekî veneqetiyayî yê têkoşîna civaka demokratîk dibînin. Werin em bi hev re xwedî li taxên xwe derkevin; em ciwanan ne ber bi tenêtiyê, ber bi piştevaniyê ve; ne ber bi bêhêviyê, ber bi jiyana rêxistinkirî ve; ne ber bi girêdayiyê, ber bi azadiyê ve bibe. Li dijî hişbiriyê, çeteyan û polîtîkayên ku civakê rizyayî dikin bêdeng nemînin. Em jiyana demokratîk, ekolojîk û azadîxwaza jinê bi hev re mezin bikin.”
‘Li dijî rizîbûnê civaka demokratîk rêxistin dikin’
Cemîl Tekînoz di dawiya axaftina xwe de Pêvajoya Aştî û Ciwaka Demokratîk bibîr xist û got: “ Ev nêzî du sal in ku geşbûna pêvajoyeke demokratîk û aştiyane, bi pêşengiya Rêber Apo tê meşandin. Ev rewş, hêvî û baweriya me ya li hember aştiya civakî hêj bêtir bihêz dike. Lê belê li ber çavên me bi destê bazirganên hişbiriyê ciwanên me ber bi mirinê ve têne kaşkirin. Ciwan paşeroja civakê ne. Parastina paşeroja me berpirsiyariya me hemûyan e. Werin em bi hev re xwedî li zarokên xwe, ciwanên xwe û paşeroja xwe derkevin. Em bawer dikin ku riya parastina ciwanan ne ji zextê; ji bihêzbûna siyaseteke demokratîk, perwerdehiya biqalîte, îstihdama ewledar, zêdebûna qadên çand û hunerê û piştevaniya civakî ya bihêz derbas dibe. Îro em careke din radigihînin.Li dijî hişbiriyê em jiyanê diparêzin. Li dijî çetebûnê em civaka demokratîk rêxistin dikin. Li dijî mêtingeriya jinê û her cûre tundiyê em jiyana wekhev û azad mezin dikin. Li dijî tenêtiyê piştevaniyê, li dijî bêumidiyê civaka rêxistinkirî mezin dikin. Xwedî li malbatên xwe derkevin, xwedî li ciwanên xwe derkevin, xwedî li rûmeta xwe derkevin. Sonda me heye ku em ê parastina mafê jiyana birûmet û azad a mirov bidomînin.”
Piştî daxuyaniyê girse belav bû.
