Platforma Saziyên Demokratîk a Mûşê ji bo protestokirina êrişên li ser Rojava civîneke gel pêk anî. Piştî civînê welatî meşiyan û daxuyanî hat dayîn.
Platforma Saziyên Demokratîk a Mûşê li dijî êrişên li ser Rojava civîna gel pêk anî û piştî civînê jî meşek li dar xist. Civîna gel li avahiya Partiya Herêmên Demokratîk (DBP) a Mûşê hat lidarxistin û endam û rêveberên partiyên siyasî û nûnerên saziyên demokratîk tev li bûn.
Civîn, bi deqeyek rêzgirtinê dest pê kir û parlamentera Partiya Wekhevî û Demokrasiyê ya Gelan (DEM Partî) ya Mûşê Sumeyye Boz di civînê de axivî. Sumeyye Boz diyar kir ku êrişên li ser Rojava êrişek li dijî destkeftiyên gelê Kurd in û got: “Aliyekî van êrişan tevgera Kurd û rêberê gelê Kurd Abdullah Ocalan hedef digire. Bi van gavan hewl didin gelê Kurd ‘bêrêber’ bikin. Em ê têkoşîna xwe li dijî vî şerê taybet berfireh bikin.”
Civîn bi nêrîn û pirsên beşdaran berdewam kir. Welatiyên beşdarî civînê bûn dubare kirin ku ev êriş, gelê Kurd û destkeftiyên wan hedef digirin. Civîn piştî beşa pirs û bersivan bi dawî bû.
Piştî civînê, girse ji avahiya DBPê heta Meydana Kobanê meşiya. Di meşê de dirûşmeyên “Bijî berxwedana Rojava” û “Rojava rûmeta gelê Kurd e” hatin berzkirin û girseyê bi çepikan êriş protesto kirin.
Li Meydana Kobanê Sumeyye Boz axaftineke kurt kir û ev tişt got: “Gelê Kurd berxwedana li Rojava li her derê belav dike û em ê vê yekê li Mûşê jî bidomînin. Ji bo têkbirina hişmendiya hov a wan çeteyan hêz û baweriya herî xurt Kurd û jinên Kurd in. Ev wehşeta ku tê kirin, bi girêdana kiravatan nayê veşartin. Ma ji bo xwînmijekî pêşkeftin e ku çetel bikar bîne? Em dizanin ku ev zîhniyeta ku kravatan li xwe dike, ronahiyê bi xwe re nayne. Ev sîstema ku wan daniye pêşiya me ne hêvî ye û ne jî îradeya jiyanê ye.”
Çalakî bi lêdana çepik û berzkirina dirûşmeyan bi dawî bû.
