Dadgeha Cezayên Giran a Midyadê derbarê endamên HUDA PARê û kesên din ên ku ji Doza Kobanê ya Kerboranê tên darizandin de biryara beraetê da. Malbatên Gezer û Toprak bertek nîşanî biryara dadgehê da.
Danişîna 3yemîn a doza kuştina Bîlal Gezer û Sînan Toprak ku di 7ê cotmeha 2014an dema çalakiyên li hember êrişên li ser Kobanê dihatin kirin, hatibûn kuştin li Dadgeha Cezayên Giran a Midyadê hat lidarxistin. Parêzer û xizmên malbatên Bîlal Gezer û Sînan Toprak, endam û rêveberên partiyên siyasî û kesên ku ji kuştina Gezer û Toprak tên darizandin tev li danişînê bûn. Danişînê bi tespîtkirina nasnameyan destpê kir.
‘Kujer bi DAIŞ, FETO û HUDA PARê re di nav têkiliyan de bûn’
Birayê Bîlal Gezer, Mehmet Emîn Gezer destpêkê axaft û got kesên ku bûne şahidê bûyerê ji ber kesên kujer ditirsin rastiyê bêjin, ji ber ku têkiliya kujeran bi Hîzbûlahê û HUDA PARê re heye. Xwîşka Bîlal Gezer, Asya Gezer piştî 12 salan nû doz hat vekirin, heya îro li ser naveroka dozê biryara nepeniyê hebû, aşkereye ku ev kesên kujer girêdayê DAIŞê, FETOyê, Hîzbullahê, û HUDA-PARê ne. Em edaletê dixwazin.
Bavê Bîlal Gezer, Yûfûs Gezer diyar kir ku berpirsyarên dewletê yên wê demê hemûyan kujer parastin û 12 salan doz venekirin. Em ê şopdarên doza xwe bin. Divê dewlet peywira ya edaletê pêk bîne û van kesan bigire.
Bavê Sînan Toprak, Teffîk Toprak bertek nîşanî biryara dadgehê ya danişîna berê da û got ku ev buyer bi destê FETOyê û destê peywirdarên wê demê hatiye veşartin. Hemû tişt di nava planeke hatiye çêkirin de pêk anîn û ne zarokên me kî li wir bûya da were qetilkirin. Namzetê Şaredariya Kerboranê Abdûrrahman Sayhan bi gefan îfadeyên kesan dide guhertin.
Dayika Sînan Toprak, Kadriye Toprak da zanîn ku îro rojbûna kurê wê ye, ew êdî nikare li hember vê êşê rasweste û edaletê dixwaze. Kadriye Gezer dema diaxivî ser hişê xwe çû û piştre nekarî axaftina xwe berdewam bike.
Heyeta dadgehê daxwaza qeydên mobeseyan red kir!
Parêzerê malbatên Gezer û Toprak, Kenan Maçoglu got ku heya niha parêzer û malbat bi derfetên xwe delîlan kom dikin, em dixwazin dîmenên qamereyan yên wê demê werin komkirin û got,” Ev doz di dema lêpirsînê gelekî bi guman e. Hin derdor dixwazin serê vê dozê bigirin. Dîmenên kargehên derdora cihê buyerê hatine jêbirin û em dixwazin ev dîmenên ku hatine veşartin derkevin holê. Midurê TEMê yê wê demê beriya biçin ser Ravza-Derê de bigirin bi telefonê li Namzetê Şaredariya Kerboranê Abdûrrahman Sayhan digere û ev kes piştre ji FETOyê tê binçavkirin. Em Kurd baş dizanin FETO li bajarên Kurdistanê çawa tevdigeriya.”
Piştî axaftina Kenan Maçoglu heyeta dadgehê navber da danişînê û piştî navberê hemû daxwazên Kenan Maçoglu red kirin.
Piştî navberê parêzerê malbatên Gezer û Toprak, parêzer Ahmet Arikan diyar kir ku kesên wê demê di îfadeyên lêpirsînê de gotine, ‘Abdûrrahman Sayhan gule li me reşandine’ piştî 12 salan bi gefan îro dibêjin tiştek wisa tuneye û got, “Ev bûyer ne buyereke ji rêzê ye û piştî serdema lêpirsînê delîlên lêpirsînê hatine windakirin. Ez dixwazim ji bo kujeran cuda cuda biryara girtinê were derxistin.”
Piştî Arikan, parêzer Dervîş Emre Aydin da zanîn ku kamerayên ku cihê kuştina Sînan Toprak dibînin beriya bûyer biqewime dixebitin û got, “Piştî buyerê jî dixebitin lê kêliyên ku bûyer pêk tê dîmenên kamerayê tuneye. Em pê bawer in ku ev dîmen ji nav dosyayê hatine derxistin, ez dixwazim pirsa vam dîmenan were kirin û ev dîmen bikevin nava dosyayê.”
Piştre Kenan Maçoglu carek din mafê axaftinê stend û got ku ez wisa difikirim ku heyeta dadgehê dê cardin biryara xwe ya danişîna berê dubare bike û got,” Niha kesên ku ji kuştina Gezer û Toprak tên darizandin di gotinên xwe yên emniyet û dadgehê de dibêjin, ‘şeva buyerê em hemû bi hev re bûm û em ji mal derneketine’ lê çawa dibe ku ev kes her kêlî bi telefonê li hev digerin. Madem li malê bi hev re ne, çi hewcehî pê heye ku bi telefonê li hev bigerin. Li vir diyar e ku tiştên nerast tên gotin.”
‘Divê kujer werin cezakirin’
Parêzerê malbata Gezer Erdal Kûzû diyar kir ku ew tev li mutalaya dozgeriyê dibin û got; “Lê li vir pirsek heye, ev doza ji bo beraetkirina tewanbarên kujer in an doza edaletê ye. Li vir em ji bo rastî derkevin holê tevdigerin. Li ku hatiye dîtin ku li deverekî 2 kes hatine kuştin û 12 salan derbarê vê bûyerê de îdeaname nayê amadekirin. Ger edalet li nêrîna siyasî û nijada kesên hatine kuştin nenêre divê kujer werin cezakirin. Divê Gerînendeyê TEMa Kerboranê yê wê demê were guhdarkirin, ji ber ku guman ew e ku vî kesî dîmenên mobeseyan îmha kirine. Ez dixwazim kujer werin cezakirin û biryara girtina wan bê dayîn.”
Piştî axaftinan dozgera dozê derbarê kesên ku ji kuştina Gezer û Toprak tên darizandin de carek din mutalaya xwe dubare kir û ceza li wan were birîn.
Piştî parastina parêzerên û îfadeya bersûcan, heyeta dadgehê navber da danişînê. Piştî navberê heyeta dadgehê daxwazên parêzerên malbatên Gezer û Toprak ên ji bo girtina kujerên red kir û derbarê hemû gumandaran biryara beraetê da.
