Desthilatdariyên federal ên DYAyê, bi îdiaya ku pereyê kirîna wî bi riya sextekarî û bertîlgirtinê ji pereyê hikûmeta DYAyê hatiye peydakirin, hewl didin dest danên ser xaniyê vîla ê Mensûr Barzanî yê li Beverly Hillsê.
Saziyên federal ên Dewletên Yekbûyî yên Amerîkayê (DYA), ji bo desteserkirina xaniyekî pir mezin û luks ê bi nirxê 30 mîlyon dolarî ku li taxa Beverly Hillsê ye, pêvajoya hiqûqî dabû destpêkirin. Hat ragihandin ku xwediyê vilayê Fermandarê Hêzên Taybet ên Pêşmergeyan Mensûr Barzanî ye. Di gilînameyê de tê îdiakirin ku Barzanî ji bo kirîna vê vilayê sextekarî li Hikûmeta DYAyê kiriye.
Bertîla sotemeniyê ya ji bo şerê li dijî DAIŞê
Li gorî nûçeya Ross O’Keefe ya ji New York Postê, Wezareta Dadê ya DYAyê Mensûr Barzanî bi girtina bertîlê ji şirketekê sûcdar dike. Ev şîrketa ku navenda wê li Vîrjînyayê ye, zêdetirî 700 mîlyon dolar ji Ajansa Lojîstîk a Parastinê ya Wezareta Parastinê ya DYAyê (DOD) wergirtiye. Ev pere ji bo gihandina sotemeniyê bo hêzên DYAyê û koalîsyonê yên ku di çarçoveya Operasyona ‘Inherent Resolve’ (Biryardariya Xwezayî) de li dijî DAIŞê şer dikirin, hatibû dayîn.
Li ser her lîtreyekê 25 sent bertîl!
Karbidestên şîrketê, ji bo ku bikaribin bi taybetî sotemeniya firokeyên jet bigihînin hêzên hevpeymanan ên li Balafirgeha Navneteweyî ya Hewlêrê, ev pereyê hikûmetê wekî bertîl dane Mensûr Barzanî. Rayedaran destnîşan kir ku Barzanî bi giştî bi sedan mîlyon dolar ji van şirketên bi Hikûmeta DYAyê re peyman çêkirine wergirtiye. Li gorî belgeyên dadgeha DYAyê ji serê her lîtreyek sotemeniyê 25 sent hatiye girtin.
Pere derbasî hesabê ‘trust’ê kiriye
Di gilînameyê de hate diyarkirin ku karbidestên şîrketê di bin zextê de bûn û eger sotemenî negihanda, dê peyman ji destê wan biçûya. Tê îdiakirin ku Mensûr Barzanî, ev pereyên bertîlê derbasî hesabekî ‘trust’ê kiriye (hesabê sêyem ê bawerpêkirî) da ku xaniyê luks ê li navnîşana 945 Foothill Road a Beverly Hillsê bikire û nûjen bike.
Nirxê vilayê 29 milyon dolarî e
Xaniyê ku 10 hezar metreçargoşe ye û 4 odeyên razanî û 8 serşokên wê hene, di sala 2018an de bi 20 mîlyon dolarî hatibû kirîn û piştre bi 30 mîlyon dolarî hate nûjenkirin. Li gorî daneyên malpera firotina xaniyan Zillow, niha nirxê vî xaniyê luks derdora 29 mîlyon dolar e.
Doz berdewam dike
Doza li ser mijarê, ji aliyê beşa Taybet a Pakkirina Pereyên Qirêj a Wezareta Dadê ve bi piştgiriya Ofîsa Karûbarên Navneteweyî tê birêvebirin. Li gorî parêzerên xezîneya DYAyê tê payîn di demek kin de xanî bi desteserkirin û radestî xezîneyê bê kirin. Her wiha bi boneya gendiliyê derbarê Mensûr Barzanî û gelek kesên pêre têkildar jî biryara qedexekirina ketina DYAyê tê xwestin.
