Enqere – Hevberdevkê Komîsyona Hiqûq û Mafên Mirovan a DEM Partiyê Ozturk Turkdogan anî ziman ku ji bo mafê heviyê pêk were TBMM û desthilata siyasî divê pêywîra xwe bi cih bînê û got: “Divê mafê heviyê bi lêz û bez bi cih were.”
Komîsyona Hiqûq û Mafê Mirovan a Partiya Wekhevî û Demokrasiyê ya Gelan (DEM Partî), tekildarî biryara Komîteya Wezareta Ewropa ya derbarê “Mafê heviyê” de daxuyanî da. Hevberdevkê Komîsyona Hiqûq û Mafên Mirovan a DEM Partiyê Ozturk Turkdogan, bi lêv kir ku tevî 11 sal li ser biryara komîteyê derbas bûnê jî, ji aliyê Tirkiyeyê ve tu gav nehatinê avetin û Rêberê Gelê Kurd Abdullah Ocalan û bi hezaran kes ji ber vê yekê bandor dibin û bang li Komîteya Ewropa kir ku li dijî Tirkiyeyê prosedura îhlale bide xebitandin.
‘Divê pêşniyarqanûn bikevin meriyetê’
Öztürk Turkdogan destnîşan kir ku ji bo pêkanîna mafê heviyê guhertinên qanûnî yên pêwîst pêk werin û wiha dirêjî da axaftina xwe: “Divê Komîsyona Yekîtî, Xwişk-Biratî û Demokrasiyê ya Neteweyî ya TBMMê, bi lez û bez bi birêz Ocalan re hevdîtinê bike û ji bo cîbicîkirina mafê hêviyê, qanûnên Entegrasyona Demokratîk nîqaş bike û pêşniyarên xwe pêşkêşî komîsyona têkildar bike. Ji bo cîbicîkirina mafê hêviyê, em bang li Serokatiya Meclîsê, partiyên siyasî yên ku di Meclîsê de ne û parlamenteran dikin ku xalên 25, 107/2 û 16, 110/9 û madeya demkî ya 2an a Qanûna Înfazê ya 5275an, herwiha xala 17/4 ya Qanûna 3713an bêne rakirin û guhertinên pêwîst di TCKê de bêne kirin.Wekî ku di biryara Komîteya Wezîran de hatiye diyarkirin, pêşniyarên qanûnê yên ku hatine pêşkêşkirin divê bikevin rojevê û bibin qanûn.”
‘Ji bo mafê heviyê divê gav ben avetin’
Ozturk Turkdogan bal kişand ser gotinên Serokê MHPê Devlet Bahçelî ku gotibû ji bo aştiyê divê her dû baskên kevokê hebin û axaftina xwe wiha domand: “Divê Wezareta Dadê ji bo cîbicîkirina mafê hêviyê gavan bavêje. Di Pêvajoya Aşitiyê û Civaka Demokratîk de, divê hevkarên Îtifaqa Komarê sozên xwe yên derbarê mafê hêviyê de bi cih bînin û ji bo ‘her du baskên aştiyê’ temam bibin gavên pêwîst bavêjin. Heta ku mafê hêviyê bi cih bê, divê hemû mafên birêz Ocalan ên ku ji qanûna îcrayê tên, bi temamî bêne cîbicîkirin, hevdîtinên bi parêzer û malbatê re bi rêkûpêk bêne kirin, serdanên Şandeya Îmraliyê zêde bibin, û serdanên parlamenter, rojnamevan, akademîsyen, STK û rêberên raya giştî bêne hêsankirin. Ji bo serkeftina Pêvajoya Aşitiyê û Civaka Demokratîk, dabînkirina tenduristî, ewlehî û şertên azadiyê yên birêz Ocalan mecburiyek e. Divê mafê hêviyê bi lez û bez bê pêkanî.”
