Êrişên artêşa Dewleta Tirk ên li ser Başûrê Kurdistanê bênavber didomin. Li gor agahiyên rêxistina CPT ya Amerîkî, artêşa Dewleta Tirk gundên girêdayî Dihokê 27 caran topbarankirin.
Endamê Tîma Kurdistan-Iraqê ya Rêxistina CPT ya Amerîkî, Kameran Osman têkildarî êrişên artêşa Tirk yên îro li ser xaka Başûrê Kurdistanê daxuyaniyek weşand. Li gor agahiyên Kameran Osman belav kirine, îro di saet 15:45an de topbaxaneya artêşa Tirk a dagirker 27 caran gundên Sîpandarê, Girgaşê, Mijê û Kevne Mijê yên herêma Bergarê yên ser bi navçeya Amêdiyê ya girêdayî parêzgeha Dihokê topbaran kirine. Li gor daxuyaniya Kameran Osman di topbaranê de ziyanên canî çênebûne lê topbaran di demekê de ye ku welatî ji bo geşt û seyranan diçin van deverên ji aliyê artêşa Tirk ve tên hedefgirtin.
Her wisa eşkere jî kir ku êrişên artêşa Tirk a dagirker ev sê rojin bo ser Çiyayê Gare û gundên derdora wî didomin.
