Komeleya Rojnamegeran a Dîcle Firatê (DFG) rojnameger Azîz Koyluoglu di salvegera yekemîn a şehadeta wî de bi bîr anî. Di daxuyaniyê de hat diyarkirin ku ew weke şopdarên heqîqetê cihê ku Azîz Koyluoglu hiştiye, bi pênûs û kameraya xwe dê vê dozê bidomînin.
Rojnameger Azîz Koyluoglu sala borî di 27ê Çileyê de bi êrişekî hewayî ya dewleta Tirk de tev li 3 kesan hate qetilkirin. DFG bi daxuyaniyekî nivîskî Koyluoglu bi bîr anî.
Di daxuyaniyê de bi kurtahî behsa jiyana Azîz Koyluoglu hate kirin û wiha hate gotin: “Kariyera xwe ya rojnamegeriyê di destpêka salên 2000î de di nava çapemeniya azad de dest pê kir. Ji nûçegihanî û kameravanî bigirin heya edîtoriyê, ji mudurê nûçeyan bigirin heya girênendeyê giştî ya weşanê, bi fedakarî û baweriyek mezin di her qada çapemeniyê de xizmet kir. Ji Hewlêrê heta Silêmanî, ji Kerkukê heta Mexmûrê; ji Dêrika Hemko heta Qamişlo, Kobanî û Efrînê, wî li ser qadeke erdnîgariya berfireh rojnamegerî kir. Li her deverê ku şer, zilm û talan hebû, wî kamera û pênûsa xwe bikar anî da ku ji bo rastiyê di tarîtiyê de nehêle. Wî jiyana xwe ji bo têkoşîna ragihandina rastiyê ji bo gel terxan kir.”
‘Em soz didin ku pênûsa wî li erdê nehêlin’
DFG anî ziman ku Azîz Koyluoglu ne tenê rojnamegerek bû; ew dengê rastiyê û şopdarê heqîqetê bû û wiha hate gotin: “Li dijî kesên ku bi kuştina wî dixwestin wî bêdeng bikin, em careke din soz didin ku em pênûs û kameraya tu hevkarê xwe li erdê nahêlin. Rastî nayê bêdengkirin. Divê baş bê zanîn ku Çapemeniya Azad li hember komkujî, êrîş, girtin û sansurê tu carî paşve gav neavêtiye û di pêşerojê de jî wê paşve gav neavêje. Em ê li cihê ku Azîz Koyluoglu hiştiye, bi pênûs û kameraya xwe vê dozê bidomînin. Em li ber bîranîna wî bi rêzdarî bejna xwe ditewînin.”
