Amed – Rêxistina DEM Partiyê ya Navçeya Sûrê li ber Mizgefta Mezin daxuyaniyê da çapemeniyê. Mehmet Deger di daxuyaniyê de xwest kolanên Sûrê ji bo zarok, jinan û ciwanan werin ronîkirin û got: “Em hişmendiya gel mehkûmî tariyê dike red dikin.”
Rêxistina (DEM Partî) ya Navçeya Sûrê bi dirûşma “Em feraseta ku gel mehkûmî tarîtiyê dike qebûl nakin“ li ber Mizgefta Mezin a navçeya Sûrê ya Amedê daxuyaniyê li darxist. Parlamenterên DEM Partiyê yên Amedê Ceylan Akça û Serhat Eren, Dayikên Aştiyê, Endam û rêveberên partiyên siyasî, nûnerên saziyên sivîl û gelek welatî tev li daxuyaniyê bûn. Di destpêka daxuyaniyê de Parlamenterê DEM Partiyê Serhat Eren axivî dû re metna daxuyaniyê ya bi Tirkî keyayê Taxa Cevat Paşa ya girêdayî navçeya Sûr ê Mehmet Deger xwend û Serokê Komelaya Muxtarên Surê Aydin Alakuş jî axaftinek kir.
Serhat Eren axaftina xwe de destnîşan kir ku wekî ku li Sûr û Baxçeyên Hewselê ji aliyê UNESCOyê ve, ji aliyê Neteweyên Yekbûyî (NY) ve wekî kelepûra çandî ya cîhanê tê qebûlkirin û ev tişt gotin: “Tenê di nav sala 2025an de cihê ku 1,5 mîlyon mirovî serdan wî kiriye. Ceyrana cihê ku wekî kelepûra çandî tê qebûlkirin, bi berdewamî tê birîn. Ne tenê qutbûna elektrîkê ye; êvarê, di tariya şevê de an jî piştî ku tariya êvarê dadikeve, jinên li vir dijîn, li Surê dijîn, zarok, astengdar, ciwan, kes ji wan nikare ji bo ku li ber deriyê mala xwe rûne, derkeve derve. Çima? Ji ber ku her der tarî ye. Ji ber ku nayê ronîkirin, kî ji tariyê hez dike? Çete ji tariyê hez dikin! Çeteyên hişbirê ji tariyê hez dikin! Dîsa çeteyên fuhûşê hez dikin! Ew çete destûrê nadin ku ev mirov li cîh û warên xwe, li ber deriyê malên xwe rûnên. Em ji vir ji DEDAŞê dipirsin. Helbet beriya her tiştî em ji Wezareta Enerjî û Çavkaniyên Xwezayê dipirsin: Hûn çima vê yekê kontrol nakin? Li cihê ku wekî kelepûra çandî tê qebûlkirin, li cihê ku bi mîlyonan mirov serdanê dikin, ma mafê mirovan ê ku li vir dijîn tune ye ku li ber malên xwe, li kolan û parkên xwe di hawirdoreke bi aram de bijîn? Hûn neçar in ku vê yekê kontrol bikin.”
‘Ez dixwazim ku herkes erka xwe bi cih bîne’
Aydin Alakûş jî anî ziman ku TEDAŞ berê jî li gorî dîtina wan li tu cihan erka xwe bi cih neaniye û wiha axivî: “Ji ber TEDAŞê jixwe cotkar ber bi têkçûnê ve çûn. Îro bi hezarana cotkarên me dev ji avdaniya zeviyan berdan. Berhem li zeviyan hatine hiştin. Sînor û hesabaku TEDAŞ niha dide herêmê, tune ye. Ji vir ez ji Wezîrê Enerjiyê jî bang dikim, pêwîst e xwedî li cotkaran derkevin, pêwîst e xwedî li taxên navendê derkevin. Em xwedî li ciwanên xwe derkevin, wan ji van rêyên tarî dûr bixin. Em ciwanên xwe bêxwedî nehêlin. Li vir bi taybetî di mijara ciwanan de erk dikeve ser milê TEDAŞê, dikeve ser milê şaredariyê, dikeve ser milê rêxistinên me yên civaka sivîl, dikeve ser milê gel û dikeve ser milê emniyetê jî. Ez dixwazim ku herkes erka xwe bi cih bîne.”
‘Em fatûreyên giran û Sura tarî qebûl nakin’
Mehmet Deger anî ziman ku tevî ku piraniya elektrîkê li herêmê tê hilberîn jî, berdêla belavkirinê ya herî bilind li Amed, Mêrdîn, Êlîh, Sêrt, Şirnex û Riha tê kirin û wiha got: “Ev ferq nêzî %30an e. Tevî vê yekê jî gel mehkûmî tariyê tê kirin. Sûretê Surê yê ku niha gihîştiye vê astê û radestî çarenûsa xwe hatiye kirin, ji ber mueyideyên ji serdemên şerê Surê ve berdewam dikin, bêusûliyên îhaleyan, kêmasiya Wezareta Jîngeh û Bajarvaniyê ya di gelek mijaran de û astengkirina xizmetên rêveberiyên herêmî ye; ev rewşa heyî bi tu awayî nayê qebûlkirin. Bi taybetî jî rewşa DEPSAŞê ya ku Surê radestî çarenûsa wê kiriye û di tariyê de hiştiye di rojevê de ye. Di nav tariyê de li her kolan û cadeyî fihûş, hişbir û çekdarî bi rengekî giran berdewam dike. Daxwaznameyên ku dihatin dayîn bêbersiv dimînin. Zarok nikarin li kolanan bilîzin, diqewime ku dayik û jinên genç di kolanên xwe de bi ewlehî bimeşin. Em pirsgirêkên kronîk ên DEPSAŞê, qutbûna elektrîkê, pirsgirêkên binesaziyê û li ser van jî fatûreyên bilind û Sur a di nav tariyê de êdî qebûl nakin.”
‘Em hişmendiya ku gel mehkûmî tariyê dike red dikin’
Di dawiya axaftina xwe de Mehmet Deger diyar kir ku pêwîst e DEPSAŞ rojek beriya rojekê serastkirinê bike, xebatên ronîkirina taxê, yên kolan û cadatên Surê pêk bîne û kêmasiyên binesaziyê sererast bike û axaftina xwe wiha qedand: “Hişbir, fihûş û çekdarî encama vê tarîtiyê ye. Em vê hişmendiya ku gel mehkûmî tariyê dike red dikin. Em dixwazin ku kolan bibin cihên ronî û jiyanbar. Em vê yekê ji bo zarokan, ji bo jinan û ji bo ciwanan dixwazin.”
