Îzmîr – Endamê Platforma Têkoşîna Li Dijî Hişbirê ya Îzmîrê Erhan Morkoç diyar kir ku di serdema Aştî û Civaka Demokratîk de polîtîkayên şerê taybet bi rêya hişbirê li ser civakê li dar in û da zanîn ku ji bo parastina ciwanan û têkoşîna li dijî vê sîstemê, divê gel li her qadê komînên xwe ava bike.
Di vê serdema Aştî û Civaka Demokratîk de, dema ku nîqaşên li ser çareserkirina pirsgirêkan zêde dibin, xetereyên li ser civakê jî di rojevê de ne. Di vê pêvajoyê de, belavbûna sîstematîk a madeyên hişbir wekî amûreke polîtîkayên şerê taybet tê bikaranîn. Ev rewş ji aliyekî ve rê li ber lawazkirina îradeya civakî vedike, ji aliyê din ve jî bandoreke neyînî li ser ciwan û jinan dike; yanî hêza guherîn û veguherîna civakê tê jehrî kirin û bêbandor kirin. Di vê çarçoveyê de gelek platform hatin avakirin û van platforman gelek çalakî û rêzeçalakî li dar xistin û pêngavên nû dan destpêkirin.
Derbarê van metirsiyan ku ev metirsî li taxên Kurdan ên Îzmîrê roj bi roj zêdetir dibin, em bi Endamê Platforma Têkoşîna Li Dijî Hişbirê ya Îzmîrê Erhan Morkoç re axivîn.
‘Pêvajoya Aştî û Civaka Demokratîk mifte ye, xelasî bi rêxistibûnê pêkan e’
Erhan Morkoç diyar kir ku heta niha ji ber şer û pevçûnan gelê Kurd nedikarî pirsgirêkên xwe bîne ziman û destnîşan kir ku ev nêzîkî du sal e, ‘Pêvajoya Aştî û Civaka Demokratîk’ dest pê kiriye, bi pêvajoyê re êdî gelê Kurd hêdî hêdî pirsgirêk xwe tîne ziman. Erhan Morkoç da zanîn ku ev pêvajo çiqasî domdar be, wê ewqasî pirsgirêk jî çareser bibin û wiha got: “Ne tenê dewleta Tirkiyeyê hemû netewe-dewlet ji bo kes ji wan re nebe sedema metirsî û talokeyan di nav gel de madeyên hişbir belav dikin û bi vî rengî gel dixin bin kontola xwe. Ev polîtîkayên şerê taybet in û ev polîtîka, heta niha di nava gelê Kurd de jî bûn xwedî tesîreke mezin. Dewlet ji xwe re dibêje: Ji dêvla li pey pey ziman, çand û îradeya xwe bikeve bila hişbirê bi kar bîne û bikeve ber deste min. Pêvajoya Aştî û Civaka Demokratîk mifteyek bû; deriyek li ber me vekir. Tenê bi rêxistinbûnê rizgarî pêkan e.”
‘Divê gel bi rola xwe rabe’
Erhan Morkoç anî ziman ku tekane çareserî ew e ku divê gel komînên xwe li tax û navendên xwe ava bike û divê xebata xwebexş û fikra rêxistinbûnê bê mezinkirin û wiha axivî: “Wekî ku tê dîtin, di vî warî de dewlet bi tena serê xwe li dijî çeteyan nikare bisekine. Yanî divê gel bi rola xwe rabe. Dema em diçin bi malbatan re diaxivin, gel ji me re dibêjin ‘Werin me ji vê mirinê xilas bikin’. Lê tişta ku tê meşandin tişteke sîstematîk e û ancax bi awayeke sîstematîk mirov têbikoşe wê demê mirov dikare xwe jê xelas bike.”
‘Mijar, mijara jiyaneke bi rûmet e’
Erhan Morkoç diyar kir ku divê gel bizanibekesên ku bûne tiryakî ne dijmin in û wiha pê de çû: “Ew mirovên me, ciwanên me ne; divê em wan rizgar bikin. Çimkî em nikarin jiyana xwe teslîmî çeteyan bikin. Divê em hemû bibin yek û xwedî li jiyana xwe derkevin; mijar, mijara jiyaneke bi rûmet e.”
‘Digotin neçin partiye, niha ji bo xelasiya zarokên xwe li deriyê partiyê didin’
Erhan Morkoç anî ziman ku ew li dijî tundiyê ne, lê xweparastin jî ferz e û wiha got: “Berê hinek malbatan ji zarokên xwe re digotin, ‘neçin partiye, dê partî we bibe serê çiyê’. Pere didan zarokên xwe digotin, ‘Çi kar û barê we li partiyê heye, biçin li kêfa xwe binêrin’. Niha ew malbat tên partiyê li deriye me didin û dibêjin, ‘Werin me ji vê jehrê xelas bikin’. Yanî çareserî xwe birêxistinkirin e; ne tenê di nava partiyekê de, li her qada ku gel lê hebe, divê mirov xwe birêxistin bike.”
