Meclîsa Ciwanan a DEM Partiyê û DEM Partî yên Stenbolê li dijî madeyên hişbir, tiryak û fihûşê daxuyanî da û diyar kir ku ew ê li dijî madeyên hişbir û fihûşê xwedî taxên xwe derkevin.
Çalakî û daxuyaniyên li dijî maddeyên hişbir, tiryak û fihûşê bênavber didomin. Li Stenbolê Meclîsa Ciwanan a DEM Partiyê û DEM Partî bi dirûşmeya “Em ji pêşerojo xwe xwedî derdikevin” li Qada Sûltanbeyliyê daxuyanî dan. Endam û rêveberên partiyên siyasî, ciwan û gelek welatî tev li daxuyaniyê bûn. Di daxuyaniyê de dirûşmeya “Bijî berxwedana ciwanan” hate berzkirin.
‘Dixwazin ciwanan bêbandor bikin’
Beriya daxuyaniyê Berdevkê DEM Partiyê yê Stenbolê Çetîn Yildiz axivî. Çetîn Yildiz diyar kir ku ji bo ciwanan ji civakê dûr bixin tiryak tê bikaranîn û got: “Bi zanebûn kolanên ku Kurd û Elewî lê zêde ne tiryak belav dikin. Dixwazin ciwanan ji siyaset û civakê dûr bixin polîtîkayên taybet dimeşînin. Dixwazin ciwanan bêbandor bikin.”
‘Ciwan bi polîtîkayên zextê nayên parastin’
Piştre endamê Meclîsa Ciwanan a DEM Partiyê Harûn Turkan daxuyanî xwend. Turkan anî ziman ku îro ew ji bo polîtîkayên dagirkerî û mêtingeriyê yên wekî madeyên hişbir, bazirganiya bedena jinê û çetetiyê taxa xwe biparêzin hatine gel hev û got: “Bikaranîna madeyên hişbir, tiryak, bazirganiya mirovan û mekanîzmayên îstîsmarê yên bi fihûşê ve girêdayî, wekî li gelek welatên cîhanê, li Tirkiyeyê jî di nav pirsgirêkên girîng ên civakî de ne. Bi taybetî bêderfetiya aborî, bêkarî, newekheviya di gihîştina derfetên perwerdeyê de û tecrîda civakî rê li ber wê yekê vedikin ku ciwan li hember van xetereyan bêparastin bimînin. Ciwan bi polîtîkayên zextê nayên parastin.”
‘Li dijî tiryakê em ê civaka demokratîk biparêzin’
Harûn Turkan destnîşan kir ku polîtîkayên mêtinger li ser taxan berdewam dike û wiha domand: “Ji bo avakirina civaka demokratîk encamên giran bi xwe re tîne. Di çarçoveya Pêvajoya Aştî û Civaka Demokratîk de jî mijarên wekî siberoja ciwanan, yekitiya civakî, beşdariya demokratîk û dadmendiya civakî derdikevin pêş. Ev rastiyeke zelal e ku perspektîfa aştiyeke mayînde û demokratîkbûnê divê ne tenê bi danûstandinên siyasî, lê di heman demê de bi polîtîkayên bibandor ên di qadên perwerde, kar, çand, xizmetên civakî û têkoşîna li dijî madeyên hişbir de bê piştgirîkirin. Em xwedî taxên xwe derkevin. Li dijî tiryakê em ê civaka demokratîk biparêzin.”
Daxuyanî bi berzkirina dirûşmeya “Ciwan li vir e, li ser piyan e” bi dawî bû.
