Rêxistina DBPa Êlihê têkildarî 2yemîn kongreya xwe ya asayî deklerasyonek eşkere kir û got ku dê bi gelê Êlihê re rêxistina bajêr bi hev re ava bikin.
Rêxistina Partiya Herêmên Demokratîk (DBP) a Êlihê deklarasyona 2yemîn Kongreya Asayî li navenda avahiya xwe daxuyaniyek da. Di daxuyaniyê de rêveber û endamên partiyên siyasî yên bajêr TUHAY-DER, MEBYA-DER, TJA û gelek endamên saziyên sivîl beşdar bûn. Her wiha di daxuyaniyê de balê kişandin ser bingeha bihêzkirina siyaseta demokratîk, mezinakirina têkoşîna rêxistinkirî û îradeya gel a ku birêve diçe.
Li ser navê komîsyonê Aktîvîsta TJAyê Dîcle Tekîk daxuyaniyê xwend.
Dîcle Tekîk diyar kir ku ew ê kongreya xwe di pêvajoya ku siyaseta demokratîk ji nû ve tê birêxistinkirin de pêk bînin û wiha got: “Ev pêvajo ji bo her qadê bibe bêhneke nû, pişteke nû û destpêkeke nû. Em ê xebateke kongreyê ya piralî, beşdarvan û bikalîte esas bigirin. Avakirina nû ya rêxistina me ya bajêr ku di siyaseta me ya Êlihê de xwedî cihekî girîng e, em ê di kongreya xwe de bi encam bikin. Ji bo di pêvajoya kongreya nû de rêxistineke bajêr a xurt ava bibe, em li benda piştgirî û pêşniyarên her kesî ne. Ji îro pê ve em starta xebatên xwe didin. Em ê bi gelê Êlihê re pêvajoyeke xurt a şêwirmandiyê bimeşînin û rêxistina bajêr bi hev re ava bikin.”
Bangawaziya xwedîderketinê
Piştre parêzer û endamê meclîsa Şaredariya Êlihê Yûnûs Bagiş axivî û ev tişt anî ziman: “Di pêşerojê de pêvajoyeke kirîtîk li pêşiya me ye. Ji ber wê yekê saziyên me ew ê endameke xurt derxînin holê. Bi pêşengiya jin û ciwanan em ê 2yemîn Kongreya xwe ya Asayî li dar bixin. Ji ber vê yekê hevalên me yên ku di nava xebatan de cih digirin, bangewaziya me li wan hevalan e xwedî li xebatan derkevin. Hêvî ew e ku rêzdar Ocalan û hemû girtiyên azadiyê azad bibin. Ji niha ve em ji hemû hevalên xwe re serkeftinê dixwazin.”
Daxuyanî bi dirûşma ‘Jin Jiyan Azadî’ û bi çepikan bi dawî bû.
