Dayikên Şemiyê di hefteya 1089emîn de li aqubeta Mehmet Şîrîn Maltu pirsîn. Di daxuyaniyê de hat diyar kirin ku divê dewlet demildest li gorî peymanan lêpirsînekê bêalî pêk bîne û hate gotin: “Divê kesên ku berpirsiyarin bên dîtin û bên darizandin. Çend sal derbas bibe jî em ê li aqubeta Mehmet Şîrîn Maltu û windayan hemû bipirsin.”
Mirovên ango Dayikên Şemiyê ji bo li aqûbeta windayan bipirsin û faîl bên darizandin di hefteya 1089emîn de li Qada Galatasarayê çalakiya heftane berdewam kir. Dayikên Şemiyê, nûnerên partiyên siyasî û saziyên civakî û gelek kes tev li çalakiyê bûn. Di çalakiyê de wêneyên windayan hatin hildan. Vê hefteyê jî li aqûbeta Mehmet Şîrîn Maltu hat pirsîn.
Daxuyanî ji aliyê Mirova Şemiyê û endama Komîsyona Windayan ya Şaxa ÎHDa Stenbolê Zeynep Yildiz ve hat xwendin.
‘Peymanên navneteweyî hatin binpêkirin’
Zeynep Yildiz diyar kir ku ew dipirsin û dê bipirsin Mehmet Şîrîn Maltu li ku ye û wiha axivî: “Di 1089 hefteye em dibêjin; di binçav de winda kirin binpêkirina mafê jiyanê ye. Tirkiye terefê peymanên navneteweyî ye. Divê dewlet demildest li gorî peymanan lêpirsînekê bêalî pêk bîne. Di hefteya 1089emîn de jî em bi bîr dixin em ê dest ji aqûbeta windayan bernedin. Ji bo ev bêaqûbetî ji holê rabê divê sûcên ku li dijî mirovan pêk hatine di tariyê de nemînin.”
‘Li pêşiya malbata wî û gundiyan îşkence lê kirin’
Zeynep Yildiz anî ziman ku di hefteya 1089emîn de li aqubeta Mehmet Şîrîn Maltuyê ku ev 31 sal in winda ye dipirsin û got: “Mehmet Şîrîn Maltu hê 17 salî bû û bi malbata xwe re li gundê Zêrbiya yê bi ser navçeya Hezoya Êlihê ve dima. Di 31ê Çileya 1995an de leşker û cerdevanan avêt ser mala malbata Mehmet Şîrîn Maltu. Leşkeran Şîrîn Maltu ji mal derxistin. Bi saetan li qada gund îşkence li Mehmet Şîrîn Maltu hate kirin. Paşê wî li wesayitê siwar kirin û birin. Piştî bi rojekê Mehmet Şîrîn Maltu çavgirtî anîn pêşiya mala wî. Li pêşiya malbata wî û gundiyan îşkence lê kirin û jê agahî xwestin lê Mehmet Şîrîn Maltû ji leşkeran re got, ‘Ez nizanim’. Paşê Mehmet Şîrîn Maltu dîsa li gel xwe birin. Ji wê rojê ve xeber ji Mehmet Şîrîn Maltu nayê girtin.”
