Li Amedê merasîma danasîna Festîvala Fîlman a Navneteweyî ya Amedê ya 3yemîn hat lidarxistin. Ev festîval dê di navbera 9-16ê Mijdarê de bê lidarxistin.
Festîvala Fîlman a Navneteweyî ya Amedê ya 3yemîn ku ji aliyê Yekîneya Sînemayê ya Serokatiya Daîreya Çand û Karên Civakî ve tê organîzekirin, piştî 8 salan ji nû ve di navbera 9-16ê Mijdarê de derdikeve pêşberî sînemahezan. Lansmana festîvalê li Qesra Cemîlpaşa ya li navçeya Sûr a dîrokî hate lidarxistin. Di danasînê de Hevserokên Şaredariya Bajarê Mezin Serra Bucak û Dogan Hatun, hevserokên şaredariyên navçeyan, serokên daîreyan, hunermend, nûnerên rêxistinên civaka sivîl û sînemahez beşdar bûn.
‘Kesên ku li atolyeyan digeriyan niha bûne sînemager’
Di axaftina destpêkê de behsa dîroka Festîvala Fîlman a Amedê hate kirin û ev tişt hatin gotin: “Di destpêka salên 2000î de hevalên me hebûn ku bi kamerayên xwe li atolyeyan digeriyan. Ew mezin bûn, bûn sînemager, di qada neteweyî û navneteweyî de xelat bi dest xistin. Îro di nav kesên ku vê festîvalê organîze dikin de ew hevalên me jî hene.”
Piştî axaftina vekirinê, sînevîzyona ku li ser pêvajoya dîrokî ya festîvalê hatibû amadekirin, hate nîşandan. Hevşaredarên Amedê Serra Bucak û Dogan Hatun axivîn û behsa girîngiya festîvalê, xebatên çand û hunerê kirin.
‘Rêwîtiya festîvalê didome’
Sînameger Lîsa Çalan li ser navê Akademiya Sînemayê ya Rojhilata Navîn axivî. Çalan anî ziman ku ew wek Akademiya Sînemayê ya Rojhilata Navîn û Şaredariya Bajarê Mezin a Amedê, piştî heşt salan, bi slogana “Dinya bi çîrokan tê cem hev” bi coşeke mezin 3yemîn Festîvala Fîlman a Amedê ji nû ve didin destpêkirin. Çalan got: “Festîvala me ya ku berê bi coşeke mezin du caran hatibû lidarxistin, ji ber rejîma qeyûm nikaribû rêya xwe bidomîne, lê niha em bi hêviyeke mezin rêwîtiya festîvalê didomînin. Di vê rêyê de em spasiya şaredariya xwe û hemûyan dikin ku hêz didin me.”
Piştî axaftinan, bi konserta kemanê ya muzîsyen û bestekarê Kurd ê kemanê yê cîhanî Dilşad Saîd, çalakî bi dawî bû.
Hevşaredaran, formayên Amedsporê diyarî endamên orkrestraya Dilşad Saîd kirin.
