CPJ bang li rayedarên Tirkiyeyê kir ku nûçegihanê Ajansa Welat Nedîm Oruç û hemû rojnamegerên girtî demildest bêne berdan.
Komîteya Parastina Rojnamegeran (CPJ), li dijî zextên dawî yên li ser xebatkarên çapemeniyê yên li Tirkiye û Bakurê Kurdistanê daxuyaniyek li ser malpera xwe parve kir. CPJê bal kişand ser zextên polîsan ên li bajarên Şirnex, Stenbol û Nisêbînê û diyar kir ku astengkirina rojnamegeran a di dema şopandina çalakiyan de, binpêkirina mafê agahdarkirina gel e.
Daxuyaniya CPJê wiha ye: “Nûçegihanê ajansa Ajansa Welat Nedim Oruç, di 14ê Çileyê li Şirnexê bi îşkenceyê hatibû desteserkirin. Nedîm Oruç piştî sê rojan, di 17ê Çileyê de bi îdiaya “propagandaya rêxistinê” ji aliyê dadgehê ve hat girtin. Nedîm Oruç di dema desteserkirinê de amadekarî dikir ku çalakiyekê bişopîne û divê ev girtina neheq bi dawî bibe.
Li navçeya Nisêbînê ya Mêrdînê jî, di dema protesto kirina erişên li ser Rojava û Suriyeyê, polîsan mudaxaleyî rojnamegeran kir. Di nav kesên hatine desteserkirin de ev nav hatine tesbît kirin:
-Pelşîn Çetînkaya (Nûçegihana JİNNEWSê)
-Heval Onkol (Nûçegihanê Ajansa Mezopotamyayê)
-Kesira Onel (Hevseroka Komeleya Rojnamegerên Dîcle û Firatê – DFG).”
CPJê her wiha bal kişand ser rewşa rojnamegerê serbixwe yê Fransî Raphaël Boukandoura. Boukandoura dema li Stenbolê çalakiya DEM Partiyê dişopand hate binçavkirin. Tevî ku ji sala 2015an ve li Tirkiyeyê dijî û xwedî destûra xebatê ye jî, ew şandin navenda dersînorkirinê (GGM) û piştre di 21ê Çileyê de hate berdan.
Nûnerê Tirkiyeyê yê CPJê Ozgur Ogret, derbarê mijarê de wiha got:”Nayê qebûlkirin ku rojnamegerên li Tirkiyeyê dema ku bûyerên civakî dişopînin, werin desteserkirin û ji karê wan werin dûrxistin. Divê rayedarên Tirk Nedim Orûç û hemû rojnamegerên din serbest berdin. Ew peywireke jiyanî bi cih tînin, ew agahiyan didin welatiyan.”
