Hevseroka Giştî ya DBPê Çîgdem Kiliçgun Ûçar ku di daxuyaniya li Wanê de axivî, êrîşa polîsan û binçavkirina jinan şermezar kir û got: “Di berbanga nîqaşên çareseriyê de em dixwazin 15ê Sibatê ku heta niha weke rojeke reş dihat pênasekirin, weke roja azadiyê bi bîr bînin û bi awayeke azad bijîn.”
Tevgera Jinên Azad (TJA) bi dirûşma “Jin ber bi azadiyê ve dimeşin” li Wanê xwestin meşekê li dar bixin. Jin, li Kolana Hunerê kombûn û li vir bi govendê û stranan li benda destpêkirina meşê sekinîn. Polîsan, hêj muzakere berdewam dikir êrişî girseya ku di nav de Hevseroka Giştî ya Partiya Herêmên Demokratîk (DBP) Çîgdem Kiliçgun Ûçar heye kirin, li jinan dan û gelek jin kirin binçavan. Polîsên ku êrîşê jinan kirin, rojnameger jî derb kirin û astengkirin. Her wiha parlementerên Partiya Wekhevî û Demokrasiyê ya Gelan (DEM Partî) jî hatin derbkirin.
Piştî êrîşa polîsan jin li ber deriyê avahiya DBPê kom bûn û li vir Hevseroka Giştî ya DBPê Çîgdem Kiliçgun Ûçar daxuyaniyek da. Jinên li ber DBPê kom bûn pankarta “Jin, ber bi azadiyê ve dimeşin” vekirin û dirûşmên “Jn jiyan azadî, azad dike Rêbertî” û “Bijî Serok Apo” berz kirin.
‘Ocalan di ciheke 12 metrekare de çareseriyê diafirîne’
Çîgdem Kiliçgun Ûçar êrişa polîsan şermezar kir û got ku gaz reşandin nav çavên jinan û bi kaşkirinê ew kirin binçavan. Çîgdem Kiliçgun Ûçar destnîşan kir ku walî, emnîyet û rêveberiya navendî gava mesele dibe jin, dibe Kurd çawa êrişkar dibin tê dîtin û wiha got: “Em bimeşin û dirûşman biavêjin wê dewlet parçe bibe? Hûn vî welatî parçe dikin. Em jin em ê li her derî biqîrin, heta demokrasî nehê vî welatî dê êrîşên wiha berdewam bikin. Ev welat di destê kapîtalîzmê de dirize, ev desthilat siyasetê dirizîne. Di berbanga nîqaşên çareseriyê de em dixwazin 15ê Sibatê ku heta niha weke rojeke reş dihat pênasekirin, weke roja azadiyê bi bîr bînin û bi awayeke azad bijîn. Rêberê Gelê Kurd Abdullah Ocalan di cihekî 12 metrekare de çareseriyê diafirîne.”
‘Ji pêvajoya nû ya aştiyê netirsin’
Çîgdem Kiliçgun Ûçar diyar kir ku ew dê weke jin perspektîfa aştiyê, perspektîfa çareseriya demokratîk a ku dê çêbibe, pêk bînin, bimeşînin. Çigdem Kiliçgun Ûçar ev yek anî ziman: “Li hemberî hemû astengiyan em ê li qadê bin. Em ê li dijî zihniyeta ku Rojîn Kabaîş kuştiye, li dijî zihniyeta ku Narin Guran kuştiye, li dijî zihniyeta ku Gulistan Dokû ne dîtiye, şer bikin. Em ê bibin pênûsê Nagihan Akarsel, kameraya Cîhan Bilgin. Em ê vê têkoşînê bi bîranîna wan canên ku me winda kirin, bidomînin. Bila tu kes netirse, ji pêvajoya çareseriyê ya nû, ji nîqaşên demokratîk netirse û xwedî derkeve. Gelo ji bo çareseriya demokratîk, aştiyeke bi rûmet li vî welatî, erkeke bi rûmettir heye? Di daxuyaniyên Birêz Abdullah Ocalan de hêvî heye, aştî û jiyana bi hevre heye û em ê heta dawiyê ji bo vê yekê têbikoşin. ”
Daxuyanî bi berzkirina dirûşma “Bijî Serok Apo” bi dawî bû.
