Amed – Rêveberê MED TUHAD-FEDê Şafî Hayme têkildarî dirêjkirina cezayê girtiyên siyasî bertekên xwe anî ziman û got: “Gelek girtî li ruxmê cezayên wan diqedin jî wan bi awayekî kêfî bernadin. Cezayê girtiyan bi kêfî dirêj dikin.”
Li gorî rapor û daneyên sazî û komeleyên mafên mirovan û hiqûqê li 402 girtîgehên Tirkiyeyê û Bakurê Kurdistanê bi giştî 420 hezar û 904 mirov girtî ne. Tevî ku kapasîteya van girtîgehan 304 hezar û 964 mirov in jî, li gorî kapasîteyê, 116 hezar û 18 girtî zêdeyî kapasîteyê di girtîgehê de girtî ne. Li gorî rapora CÎSSTê rêjeya tijebûnê li girtîgehan ji sedî 138 e. Li gorî raporê 357 hezar û 646 girtî cezayê wan hatiye êrêkirin. 63 hezar û 258 mirov jî li gel darizandina wan didome, bêyî ku ceza li wan bê birîn bê ceza tên girtin.
Li gorî rapora Komeleya Mafên Miorvan (ÎHD) a 28ê Nîsana 2025an jî li Tirkiyeyê 161 jê jin, 1251 mêr bi giştî herî kêm 1412 girtiyên nexweş hene. Ji van girtiyan 335 girtî rewşa wan giran e. 230 girtî bi tena serê xwe nikarin bijîn û divê serbest bêne berdan.
Tenê li Girtîgehên Îzmîrê ji serê salê heta niha cezayê 15 girtiyên siyasî hatin dirêjkirin. Li gorî daneyên Şaxa OHDê ya Îzmirê ji serê Çileya 2025an ve heta niha cezayê 15 girtiyan dirêj kirine û li gel cezayê wan qediyaye jî nayên berdan.
Rêveberê Federasyona Komeleyên Hiqûq û Piştevaniyê ya Malbatên Girtî û Hikumxwaran a Medê (MED TUHAD-FED) Şafî Hayme têkildarî dirêjkirina cezayên girtiyan axivî û got: “PKKê xwe fesix kir. Piştre çek şewitandin. Herî dawî hêzên xwe ji Tirkiyeyê vekişand. Guh da banga Rêberê Gelê Kurd Abdullah Ocalan. Lê Tirkiye li aliyekî di pergala cerdevaniyê de israr dike, li aliyê din girtiyan serbest bernade. Ji bo jiyanek hevpar û bi tifaq divê berî her tiştî girtiyên siyasî serbest berdin. Divê girtiyên nexweş serbest berdin.”
‘Girtiyên nexweş nayên berdan’
Şafî Hayme da zanîn ku girtiyên nexweş bi kêfî nayên berdan û wiha got: “Hin caran cezayên wan şeş mehan hin caran salekê dirêj dikin. Gelek girtî li ruxmê cezayên wan xelas bûne jî bi awayekî kêfî nayên berdan. Dayika Aştiyê Şefîka Kandal 65 salî ye û girtiyek nexwaş e, lê dîsa jî nayê berdan. Semîra Dîrekçî girtiya nexweş e. Mehmet Emîn Çam di girtîgeha Batmanê de nexwaş e. Nikare pêvîdîyên xwe bîne cîh. Kasim Saglik li Rîzeyê girtî ye. Di hucreyê de tê girtin. Hayatî Kaytan li girtîgeha Boluyê nexweş e. Mehsûm Yûksekdag di Girtîgeha Erziromê de ye û nexweş e.”
‘Divê Rêberê Gelê Kurd Abdullah Ocalan bê berdan’
Şafî Hayme herî dawî diyar kir ku muxatabê pêvajoyê Rêberê Gelê Kurd Abdullah Ocalan e û got: “Divê berî her tiştî Rêberê Gelê Kurd Abdullah Ocalan bê berdan. Heta niha komîsyona Meclîsê tu gav neavêtiye. Divê komîsyon biçe bi Abdullah Ocalan re biaxive. Lê tiştek nekiriye. Hê jî girtîyên nexweş nehatine berdan. Ev komîsyon dê çawa baweriyê bide mirov. Em dixwazin pirsgirêka Kurdan bi rêya siyasî û hiqûqî bê çareserkirin û em bi hev re azad bijîn.”
