Civîna Çarçoveya Hemahengiyê ya ji bo diyarkirina namzetê postê serokwezîrê Iraqê li ofîsa Humam Hemûdî destpê kir.Di civînê de ger nakokî berdewam bikin dê li ser namzetekî lihevkirinê lêkolîn were kirin.
Civîna Çarçoveya Hemahengiyê li ofîsa Serokê Encûmena Bilind ya Îslamî Humam Hemûdî a bi armanca diyarkirina namzetê postê serokwezîrê Iraqê destpê kir.
Ev cîvîna Çarçoveya Hemahengiyê berdewama rêzecivînên ku ya destpêkê di duşema borî de hatibû kirin lê nekarîbû ji bo diyarkirina namzetê serokwezîr kesekê diyar bikin. Lewre biryara diyarkirina namzet ji bo civîna roja sêşem û çarşemê hatibû paşxistin. Lê roja çarşemê jî civîn ji bo îro hatibû paşxistin.
Her wiha Serokomarê Iraqê Nizar Amêdî di hesaba xwe ya Xê de peyamek arasteyî Çarçoveya Hemahengiyê kir ku zûtirîn demğ de namzeteki ji bo postê serokwezîrê Iraqê diyar bike. Ji ber ku tenê rojek ji serokomar re maye ku namzedê Çarçoveya Hemahengiyê ku mezintirîn fraksiyona li Parlamentoya Iraqê ye, destnîşan bike da ku erkê avakirina hikûmetê bigire ser xwe.
Di vê çarçoveyê de, nûçegihanê Rojnewsê yê li Bexdayê ragihand ku di civînê de pêşniyarek hatiye kirin ku eger nakokî berdewam bikin, li ser namzetekî lihevkirinê lêkolîn were kirin. Nûçegihan got ger li ser Îhsan Ewadî ku namzetekî nêzîkî Sûdanî, yan jî Basim Bedrî ku namzetekî nêzîkî Malikî ye lihevkirinek neyê kirin, ku ji bo vê vebijarkê sê nav têne nirxandin û yek ji wan dê were hilbijartin.
Berê, parlamenterên ji Çarçoveya Hemangengiyê ji Rojnewsê re tekezî li ser bilezkirina çareserkirina vê pirsgirêkê kirin. Berî ku dema destûrî biqede, wan hişyarî da ku derbasbûna vê demê bêyî lihevkirinek dikare bibe sedema “binpêkirineke mezin” ku Çarçoveya Hemahengiyê berpirsiyariya wê bigire ser xwe.
Hêzên siyasî yên di nav Çarçoveya Hemahengiyê de, ji ber sînordarkirinên demê û helwestên cuda yên di navbera endamên wê de, di gihiştina lihevkirineke dawî de bi astengiyeke mezin re rûbirû dimînin.
