Bi wêneyan pêvajoya entegrasyonê: HSD li baregehan asayîş li wargehan bi cih bû

Li Rojavayê Kurdistanê hêzên leşkerî û ewlehiyê li gorî Peymana 29ê Çile ji nûve hatin bicihkirin. HSD wekî çar tûgayan li 10 bajarên Rojavayê Kurdistanê, hêzên ewlehiyê jî li hemû bajarok, bajar û gundên wan bi cih bû. Dewir teslîma di navbera HSD û hêzên Asayîşa Rojavê û her wiha vegera hêzên asayîşê ji bo navçe û bajarokên ku hêzên Hikûmeta Demkî ya Sûriyê jê vekişiyayî ji hêla gel ve bi coş û perojek mezin hate pêşwazîkirin. 

Peymana 29ê Çile ku di navbera HSD û Hikûmeta Demkî ya Suriyeyê de hatibû îmzekirin ber bi dawiyê ve diçe. Di çarçoveya pêkanîna peymanê de 2yê Sibatê şandeyên Şam û Rojava li Cizîrê û Kobanê civîn û plansaziyek hevpar derxistin. Li gorî plansaziyan dest bi pêkanîna xalên peymanê hate kirin. Xala sereke ku li ser tê rawestîn hêzên leşkerî û ewlekariyê ne.

HSDê karê nav bajaran dewrî asayîşê kir

Ji 10ê Sibatê ve li herêma Cezîrê û Kobanê cihên ji nûve bicîhkirina hêzên leşkerî û hêzên ewlekariya hundirîn pêk hat. Hêzên HSDê wekî 4 tûgayan hatin vesazkirin. 3 tûgay li herêma Cizîrê û yek jî li Kobanê li baregehên hatine destnîşankirin bi cih bûn. Piştî vekişiyana hêzên leşkerî ji bajaran hêzên ewlekariya hundirîn wezîfe dewir kir û li şûna hêzên leşkerî girt.

HSD li 10 bajaran bi cih bû 

Hêzên HSDê dê li bajarên Rojavayê Kurdistanê Hesekê, Til Temir, Dirbêsiyê, Amûdê, Qamişlo, Tirbesipiyê, Çilaxa, Girkê Legê, Dêrik û Kobanê baregehên xwe ava bike. Li aliyê Cizîrê hêz heta niha li Hesekê, Qamişlo, Girkê Legê, Dirbespiyê û Çilaxa bi cih bûn. Li van bajaran kar û barên ewlehiyê dewrî Hêzên Ewlehiya Hundir hate kirin. Li aliyê Kobaniyê jî hêzên HSDê li baregehên Şêxlerê bi cih bûn. Tê payîn ku hêz di demek kin de li baregehên din ên hatine diyarkirin bi cih bibe û ev pêvajo bi dawî bibe.

Hêzên Hikûmeta Demkî vedikişin

Ligel vesaziya hêzên HSDê hêzên Hikûmeta Demkî ya Şamê jî gav bi gav ji derdora bajarên Kurdan vedikişin. Heta niha li Hesekê hêzên xwe vekişandine baregehek li derveyî navçeya Şeddadê û li Kobaniyê jî heta xeta Şêxlerê vekişiyan e.

Hêzên Şamê dê ji 5 navçeyên din vekişe

Li gorî peymanê divê hêzên Hikûmeta Demkî li aliyê Cizîrê xwe ji navçeyên Til Koçer, Til Hemîs, Holê û li aliyê Kobaniyê ji navçeyên Çelebî û Sirrînê jî vekişin. Li van deveran jî piştî vekişiyana hêzên Hikûmeta Demkî hêzên Asayişa Rojavayê Kurdistanê wê berpirsyariyê dewir bigirin. Hêzên HSDê jî dê li baregehên nêzîk van bajaran hatine diyarkirin bi cih bibe. Çavkaniyên leşkerî, li ser ji nûve bicîhbûnê û avakirina tabûran xebat û danûstendin berdewam dikin. Çav li rê ye ku di rojên pêş de pêkanîna vê xala peymanê bi dawî bibe.

Dîmenên balkêş derketin holê

Hêzên HSDê heta niha hem li derveyî bajaran û hem jî li baregehên di nav bajaran de cih digirtin. Piştî peymanê li baregehên derveyî bajaran bi cih bûn. Baregehên xwe yên di nav bajaran de dewrî asayîşê kirin. HSDê hemû baregehên xwe yên nav bajar bi merasîmê dewrî asayîşê kirin. Di dema dewir teslîmê nîzamî de dîmenên rengîn û balkêş derketin holê.

Deverên mijara dubendiyê

Li hind navçe, bajarok û gundên ku di aliyê nifûsê de têkel in di navbera HSD û Hikûmeta Demkî de mijara dubendî û nîqaşê bûn. Rewşa van deverên wekî erdnîgarî axa Kurdistanê lê di aliyê nifûsê de giraniya wan Ereb bin, bi Peymana 29ê Çile hate hate zelalkirin. Li gorî peymanê hêzên Hikûmeta Demkî dê ji van deveran vekişiya û Asayîşa Rojava dê lê cih bibûya.

Gel hêzên xwe bi cok pêşwazî kirin

Di çarçoveya peymanê de heta niha hêzên Hikûmeta Demkî ji beşek deveran vekişiyan û hêzên asayîşê li van bajarok û gundan bi cih bû. Di dema vegerê de niştecihên van deveran hêzên asayîşê bi coş û peroşek mezin pêşwazî kir. Asayîş li hind deveran asayîşa Rojava bi şekirokan, li hind ciyan bi çepik, tîlîlî û sloganan û li hind deveran jî dahol û zirneyan hate pêşwazîkirin. Dema hevdîtin û hembêzkirina hêzên asayîşê dîmenên geh hestewar, gel bextewar derketin holê.