Bi sedan kes serdana şîna endamê HPGê Gok kirin. Li gel hewldana astengkirina polîsan jî girse meşiya û dirûşma, “Şehîd namirin” berz kir.
Di nav de Parlamentera DEM Partiyê ya Şirnex Newroz Ûysal Aslan, rêveber û endamên DEM Partî û DBPê yên navçe û navenda Şirnex, endam û rêveberên Mebya-Derê, Tuhad-Fedê, Dayîkên Aştiyê, aktîvîstên TJAyê, hevşaredar û endamên şaredariyên herêmê û sedan welatî serdana şîna Endamê HPGê Adem Gok (Nizar Cizîrî) ku di 1î Îlona 2019an li Metîna jiyana xwe ji dest dabû ya li taxa Sûrê ya navçeya Cizîra Şirnexê hatiye dayîn, kirin.
Girseya ku li kolana şîna Gok hatiye danîn gihişt hev, diruşma, “Şehîd namirin” berz kir. Li ser vê yekê polîsan xwest pêşiya girseyê bigire û destûr neda dirûşm werin berzkirin. Girseyê bertek nîşanî vê yekê da û bi meş û berzkirina dirûşmeyan heya cihê şînê meşiya.
Li cihê şîna Gok destpêkê ji bo cangoriyên azadiyê rêzgirtin pêk hat. Piştî rêzgirtinê Parlamenter Newroz Ûysal Aslan axivî û bertek nîşanî helwesta polîsan da.
Ûysal destnîşan kir ku dewlet li Cizîrê dixwaze provakasyonê pêk bîne û wiha got: “Li Cizîrê dewlet hewl dide xwedîderketina nirxan bide astengkirin. Duh xwestin li mala şînê pêşiya serdana şînê bigirin û îro jî dixwazin me asteng bikin. Li Cizîrê dixwazin provakasyonê pêk bînin. Yên ku li Enqere di komîsyonê de rûnîştine ger vê rewşa Cizîrê ber çavan negirin ê çawa ji bo pêvajoyê bibin bersiv. Ev pirsgirêk ya me hemûyan e. Li bajarekî dewlet destûr nade şîn were dayîn, ev provakasyon e û em vê yekê qebûl nakin.”
Ûysal herî dawî bi lêv kir ku şehîd nirxên herî pîroz ê gelê Kurd in û tu hêz nikare navberê têxe nava gel û nirxan.
Piştî axaftina Ûysal dua hat xwendin û girse belav bû.
