Berdevka YPJê Roksan Mihemed diyar kir ku êrişên mezin li ser Bakur û Rojhilatê Sûriyeyê hene û bang li gelê Kurd û dostên wan kir ku ji bo parastina Rojava rabin ser pêyan.
Berdevka Yekîneyên Parastina Jin (YPJ) Roksan Mihemed bi peyamek vîdeoyê banga xwedîderketina li Rojava kir. Roksan Mihemed bi bîr xist ku ji bo mirovahiyê biparêzin wan bêyî teredût canê xwe feda kiriye û anî ziman ku îro dora parastina Rêveberiya Xweser a Bakur û Rojhilatê Sûriyeyê ye. Roksan Mihemed ev peyam da: “Yên êrîş dikin ne mirovahî ne jî exlaq li gel wan heye. Niha êrişên giran didomin. Êrişên ji aliyê HTŞ, DAÎŞ û dewleta Tirk e ve tên kirin. Ev êriş ne tenê ji bo Bakur Rojhilatê Sûriyê dê ji bo hemû mirovahiyê bibe bela. Me bêteredût canê xwe feda kir ku em mirovahiyê biparêzin. Bêdengiya hêzen navdewletî jî rê li ber van êrişan vedike.”
‘Êriş dê bi şerê gelê şoreşgerî bên têkbirin’
Di berdewama peyama xwe de Roksan Mihemed got ku bi têkoşîna şerê gelê şoreşger çawa li Kobanê, Tişrînê, Reqa û Baxozê çete têk biribin dê cardin bi şerê gelê şoreşgerî li ber xwe bidin û serbikevin. Roksan Mihemed wiha axivî: “Divê em îro Kurd û dostên wan bi hev re li qada cengê û berxwedanê bin. Ji ber ku ev sedsal sedsala misogerkirina azadiya gelan e. Em dibînin gelê me hem li Bakur û Rojhilatê Sûriyê, li cîhanê û bi taybet li Bakurê Kurdistanê her tim li ser pêyan bûye. Li çar perçeyên Kurdistanê divê gelê me rabe ser piyan û têkoşînê mezin bike. Tu êriş nikarin hêza gelek ji bo azadiyê têdikoşe, têk bibe. Banga me li hemû gelê me û dostên me ye ku ji bo parastina Rojava rabin ser piyan.”
