Meclisa Jinan a Tevgera Civaka Demokratîk (TEV-DEM) bi dirûşma “Jina birêxistinkirî garantiya avakirina civaka demokratîk e” kongreya xwe ya yekemîn bi beşdariya 375 delegeyan li bajarê Hesekê yê kantona Cizîrê li dar xist.
Piştî axaftinan, li perspektîfên Rêber Abdullah Ocalan hate guhertin. Dûre sînevîzyon li ser kar û xebatê hate pêşkêşkirin. Piştre rêzikname ji hêla endama Tevgera Civakên Demokratîk Maya Ehmed ve bi kurdî û erebî hate xwendin û piştî nîqaşan hate erêkirin.
Nûrşan Ferho wek berdevka Meclisa Jinan a Bakur û Rojhilatê Sûriyeyê û Şerîn Hesen wek cîgira berdevka meclisê hatin hilbijartin. Her wiha endamên meclisê jî (50 kes) hatin hilbijartin.
Di dawiya kongreyê de berdevka Meclisa Jinan a Bakur û Rojhilatê Sûriyeyê Nûrşan Ferho axivî û wiha got: “Ev baweriya ku we daye min, berpirsyariyeke mezin e û ez ê bi hemû dilpakiya xwe û bi bawerî hilgirim. Em wek jin di vê meclisê de bi biryar in ku li ser esasên jiyana azad û wekhev rola xwe bi awayekî zelal û wêrek pêk bînin. Ev meclisa me ne tenê organeke rêxistinî ye, belkî derbirîna yekitiya dengên jinan di civaka me de ye û qadeke ji bo birêxistinkirina jinên çalak û xwedî rola pêşengiyê di hemû qadên jiyanê de ye.”
Nûrşan axaftina xwe wiha berdewam kir: “Îro em li ber sembolên rastîn ên ku îro diafirînin û pêşerojê çêdikin, bi hurmet û serbilindî radiwestin. Jinên destkeftiyên şoreşê parastin û wê her tim biparêzin û di avakirin û pêşxistina civakê de bûn stûnên bingehîn.”
Nûrşan Ferho wiha dawî li axaftina xwe anî: “Em ê li ser rêya şehîdên xwe û felsefeya Rêber Abdullah Ocalan bimeşin. Bi saya felsefeya Rêber Apo jin ji zîhniyeta paşverû rizgar bûn û vegerînin hebûna xwe ya azad û bihêz.”
Piştî axaftinê kongre bi dawî bû.
