Duh êvarê li Êlihê Mehmet Dîrek û kur û biraziyê xwe di êrişek çekdarî de hatin kuştin. Walîtiya Êlihê derbarê êrişê de daxuyanî da û diyar kir ku êriş ji ber berdewamiya xwînitiyek berê pêk hatiye.
Duh êvarê li Goristana Asriyê ya Êlihê ya li Taxa Guneykentê rêveberê Navçeya Navendî ya AKPa Êlihê Mehmet Dîrek, kurê wî Ercan Dîrek û biraziyê wî Bekîr Dîrek di êrişek çekdarî de hatin kuştin. Piştî ku dengê çekan hate bihîstin, welatiyên li derdorê li hawara bûyerê çûn. Welatiyan rewşê ji polîs û tîmên tenduristiyê re ragihandin. Tîmên tenduristiyê yên ku hatin cihê bûyerê tespît kirin ku her sê kes jî jiyana xwe ji dest dane. Cenazeyên her sê welatiyan ji bo otopsiyê rakirin Nexweşxaneya Perwerdehî û Lêkolînê ya Êlihê.
Walîtiya Êlihê derbarê bûyerê de daxuyaniyek nivîskî belav kir û diyar kir ku di êrişê de 3 kesan jiyana xwe ji dest dane û 2 kes jî birîndar bûne. Walîtiyê da zanîn ku êriş weke berdewamiya neyartî-xwînitiya bûyereke di 16ê Gulanê de pêk hatibûye. Walîtiyê bi bîr xist ku di bûyera 16ê Gulanê de jî kesek hatiye kuştin û kujer hatine girtin. Walîtiyê ragihand ku du gumanbar derbarê bûyerê duh êvarê de hatine binçavkirin.
Derbarê bûyera kuştina her sê welatiyan de lêpirsîn hate destpêkirin û ji bo tespîtkirin û girtina êrişkaran xebat hate destpêkirin.
