Baroya Wanê bi daxuyaniyekê bertek nîşanî îşkenceya polîsan a di 22ê Nîsana 2026an de li navçeya Elbakê hatiye pêkanîn da û xwest bûyer ji hemû aliyan ve bi awayeke bandor bê lêkolînkirin.
Baroya Wanê têkildarî bûyera îşkenceya polîsan a li navçeya Elbakê ku di 22yê nîsanê de hatibû pêkanîn li avahiya xwe ya li navçeya Rêya Amûşê daxuyaniyek da. Ciwan Diyar, Îsmaîl û Fatîh Deger ên birayê hev û îşkence li wan hatibû kirin jî tev li daxuyaniyê bûn.
Boroye di daxuyaniya xwe de de destnîşan kir ku nêzî 25-30 polîsan îşkence li 3 ciwanên ku birayê hev bûn kir û ciwan bi awayekî derqanûnî binçav kirine. Baroyê bertek nîşanî bûyera îşkenceyê da û xwest bûyer ji hemû aliyan ve bê lêkolînkirin.
‘Erka dewletê lêkolînkirin e’
Endamê Navenda Mafên Mirovan a Baroya Wanê Nejdet Ceyhan metna daxuyaniyê xwend û berpisyariya dewletê bi bîr xist. Nejdet Ceyhan wiha got: “Erka dewletê ew e ku li gorî erkên erênî divê îddîayên muameleya xerab bi lez, serbixwe, bêalî û bibandor lêkolîn bike. Ev erk di heman demê de têkiliyê bi şerê li dijî politikayên necezakirinê re jî heye. Nelêkolînkirina bibandor û polîtîkayên bêcezahiştinê dibe sedema domandina binpêkirinên mafên mirovan.”
‘Divê pêvajoya dadwerî bi lêz bê destpêkirin’
Di berdewama daxuyaniyê de Nejdet Ceyhan banga lêkolîneke berfireh kir û axaftina xwe wiha bi dawî anî: “Divê bûyer bi hemû aliyên xwe ve, bi lez û bi awayekî serbixwe û bêalî were lêkolînkirin, karmendên dewletê yên berpirsiyar werin diyarkirin û li ser wan bi lez pêvajoyên dadwerî û îdarî werin destpêkirin. Divê kesên berpirsyariya wan di bûyerê de hene demildest ji kar werin dûrxistin, rewşa tenduristiyê ya ciwanan bi awayekî serbixwe were diyarkirin û hemû mafên wan werin parastin. Her wiha divê delîl jî werin parastin û pêvajo bi prensîba şefafiyê were birêvebirin.”
Çi bibû?
Li navçeya Elbakê ya Wanê di 22yê nîsanê de polîsan 3 ciwanên bira ên bi navê Fatîh, Îsmaîl û Diyar Deger bi awayekî derqanûnî binçav kiribûn û di dema binçavkirinê de jî îşkence li wan kiribûn. 3 ciwanên ku hatibûn îşkencekirin, ragihandibûn ku ew polîsên sivîl ên ji ber ku li gorî rêzikên trafîkê tevnegeriyane, hişyar kirine û anîn ziman ku polîsan li ser vê yekê li wan dane. Polîsan her sê bira biribûn midûriyeta polîsan û nêzî 25-30 polîsan îşkence li ciwanan kiribûn. Her wiha polîsan bi hinceta şûştina xwîna li ser sûretê wan, ciwan biribûn daşîrê û îşkenceya xwe li wir jî berdewam kiribûn. Piştî buyerê ciwan bi malbatên xwe re çûbûn nexweşxaneyê û rapora lêdanê hilgirtibûn û dabûn zanîn ku ew dê derbarê polîsan de giliyê bikin.
