Amed – Gerînendetiya Giştî ya AVAMED ya Şaredariya Bajarê Mezin a Amedê, ji bo dabînkirina ava vexwarinê ya ji bo cihên nû yên niştecihbûnê, li navçeyên Pîran û Hênê bi tevahî 1.122 mîtro xeta nû raxist û taxên gundewarî bi şebekeya avê a heyî ve girêda.
Gerînendetiya Giştî ya Kargêriya Av û Kanalîzasyonê (AVAMED) ji bo ku avahiyên nû yên li gundiyan ava dibin bi binesaziya ava vexwarinê re pêş bikevin, li navçeyên Pîran û Hênê xetên nû yên şebekeyê xistin dewrê. Xebatên ku di bin kordînasyona Serokatiya Daîreya Herêma 2yan a Karsaziyan de hatin meşandin, hişt ku cihên niştecihbûnê yên li derveyî sîstema heyî mabûn, rasterast bi tora ava vexwarinê ve bên girêdan.
Xetên nû hatin çêkirin
Di çarçoveya xebatan de li navçeya Hênê; li Taxa Kuyularê 150 metre, li Taxa Kalabayê 210 metre û li Taxa Abacilarê 42 metre xeta ava vexwarinê hat raxistin. Li navçeya Pîranê jî; li Taxa 15 Tîrmehê ya navendê 300 metre, li Taxa Bozobayê 300 metre û li Taxa Yeşilsirtê 120 mitro xeta nû hat çêkirin.
Avahîsazî li gor pêdiviyan tê pêşxistin
Bi çêkirina xeta 1.122 metreyan, ji bo qadên nû yên avahîsaziyê gihandina ava vexwarinê hat mîsogerkirin. Van xebatan alîkarî da ku li taxên gundewarî hewcedariya binesaziyê ligel geşbûna niştecihbûnê bi hev re bê meşandin û gihîştina welatiyan a avê bi awayekî plankirî pêk bê.
Serokê Daîreya Herêma 2yan a Karsaziyan Serkan Karyagan diyar kir ku li cihên niştecihbûnê yên gundewarî, plankirina şebekeyê bi awayekî ku qadên nû yên avahîsaziyê li ber çavan bigire tê pêşxistin. Karyagan destnîşan kir ku bi xebatên hatine kirin, rasterast bersiv dane hewcedariya ava vexwarinê ya cihên nû yên niştecihbûnê.
