Alîgirên welatparêz ên Amedsporê li dijî polîtîkayên qirêj ên li ser ciwanan tên meşandin meşiya û piştre daxuyanî dan. Di daxuyaniyê de hate diyarkirin ku ew ê li hemberî hişbir, fihûş û çetetiyê têkoşîna xwe bilind bikin. Di daxuyaniyê de girtina sê alîgirên wan jî hate şermezarkirin û banga berdana wan hate kirin.
Alîgirên Amedspoê li dijî zêdebûna bikaranîna hişbirê û polîtîkayên têkbirina civakê li ber pastaxaneya Hacibaba ya navçeya Peyasê ya Amedê li heta xaçerêya Stadayuma Amedporê meşiyan û piştre daxuyaniyek da. Hevşaredara Bajarê Mezin a Amedê Serra Bucak, Hevşaredarê Rezanê Sîraç Çelîk, Hevberdevkê Platforma Şiyar Be Murat Kan, nûner û saziyên sivîl û bi hezaran aligirên Amedsporê tevlî meşê bû. Di meşê de dirûşmên “Bijî berxwedana ciwanan”, “Jin ,Jiyan, Azadî” û “Ciwan li wir in firoşkar li ku ne” hatin berzkirin.
Piştî meşê daxuyanî hate xwendin. Metna daxuyaniyê ya Kurmancî li ser navê komên alîgirên Amedsporê Harun Karataş ya Tirkî li ser navê Morbarîkatê Seda Erdîl xwend.
‘Em ê tax, kuçe û stada xwe biparêzin’
Harun Karataş diyar kir ku ew ê li hemberî van êrîşan bêdeng nemînin û wiha hate gotin: “Mijara hişbir, fihûş û çetetî ne mijareke ku em bikarin çavên xwe li ser bigirin û bêdeng bimînin. Em bawer dikin ku gel û ciwanên ku berxwedanê wekî bingeha jiyana xwe dibînin, dê bi ruhê seferberiyê rabin ser piyan. Em wekî alîgirên welatparêz ên Amedsporê li dijî jiyana rizî û çeteyiyê li parastina tax, kuçe, mal û stada xwe radibin.”
‘Bila hevalên me yên dîlgirtî bên berdan’
Harun Karataş di berdewamiya daxuyaniyê de bal kişandin ser girtina her sê hevalên wanê bi navê Furkan, Mazlum Dogan û Hêjar ku li dijî firotina hişbirê dengê xwe bilind kiribûn: “Ev rêhevalên me yên ku li kuçe û kolanan li dijî firotina hişbirê dengê xwe bilind kirin, hatin dîlgirtin. Ya sosret û nebaş ew e ku van hevalên me birin menzelên firoşkaran. Em dîlgirtina her sê rêhevalên xwe bi hincetên pûç û bêbingeh qebûl nakin û bang dikin ku demildest bên berdan. Heta em wan azad nekin, em ê dev ji vê têkoşînê bernedin.”
Alîgiran bang li hemû sazî, dezgehên civakî û rêveberiya Amedsporê kirin ku li kêleka ciwanan cih bigirin û piştgiriyê bidin vê têkoşînê da ku pêşerojeke rast bi hêza gel û ciwanan ji nû ve bê avakirin.
Daxuyanî bi dirûşmên “Bijî berxwedana ciwanan” û “Bijî Amedspor” bi dawî bû. Piştî daxuyaniyê alîgirên Maedsporê ji bo temaşekirina maça Amedspor û Erziromsporê derbasî stadyumê bûn.
