DEM Partî, CHP û Partiya Rêya Nû li dijî tayînirina qeyûman li pêşiya Wezareta Karên Hundir daxuyaniyê dan. Gulistan Kiliç Koçyîgît, anî ziman ku qeyûm meseleya 85 milyon gelê Tirkiyeyê ye û xwest piştevaniya xwe bêtir xurt bikin.
Serokwekîla Koma Partiya Wekhevî û Demokrasiyê ya Gelan (DEM Partî) Gulistan Kiliç Koçyîgît, Serokwekîlê Koma CHP’ê Mûrat Emîr û Serokê Koma Partiya Rêya Nû Bulent Kaya jî di nav de, gelek parlamenter li pêşiya Wezareta Karên Hundir têkildarî tayînirina qeyûman daxuyanî dan.
Ewil Gulistan Kiliç Koçyîgît axivî û wiha got: “Em dîsa li pêş Wezareta Karên Hundir in. Ji ber ku li vî welatî her roj, darbeyên li dijî demokrasiyê pêk tên. Her roj mafên azadiyê tên astengkirin. Mixabin êdî Destûra Bingehîn ji holê hatiye rakirin. Em kesên li vî welatî tekoşîna aştî, azadî, demokrasî û wekheviye didin, em dixwazin denge xwe bilind bikin û li dijî van bêhiqûqiyan îtiraz bikin. Em dixwazin li dijî rejîma darbeyê parastina demokrasiyê bikin. Em dixwazin li dijî rejîma darbeyan nirxên gerdûnî biparêzin. Em dixwazin siberoja vî welatî biparêzin. Em li vir bi hevre denge xwe bilind dikin. Hûn dizanin duh qeyûm tayînî Şaredariya Sêrtê kirin. Berê jî qeyûm tayînî 7 şaredariyên me û 2 şaredariyên CHPê kiribûn. Disa bi heman rengî Şaredarê Beşîktaşê li dijî hiqûqê hat girtin. Dê sibê Şaredarê Bajarê Mezin Ekrem Îmamoglu biçe îfadeyê bide. Dîsa em dibînin kedkarên çapemeniyê tên binçavkirin û girtin. Em dibînin ku li dijî hemû kesên muxalif ku gotinên xwe dibêjin operasyonek qirkirinê heye. AKP dixwaze li gorî xwe ji bo xwe baxçeyên gulan ava bike. Bi tunekirina mafên me yên heq û hiqûqê û azadiyê dixwaze hebûna xwe berdewam bike. Lê li dijî vê yekê dê têkoşîna me bidome dê gotinên me hebin. Em tu kes vî krasê înkar, zext û zorê ku dixwazin li me bikin qebûl nakin. Em demokrasiya vî welatî û mirovên vî welatî diparêzin. Em mafê bijartin û hilbiartinê diparêzin. Em ê heta dawî biparêzin. Ji 2016an heta niha dixwazin vî welatî bi qeyûman bi rêve bibin. Li dijî qeyûman gelê me di her hilbijartinê de bersîva pewist dan qeyûman. Gelê me û hemû gelê Tirkiyeyê bersivê pewist da.”
Dixwazin welatiyan ji welatîbûnê derxin
Gulistan Kiliç Koçyîgît, bal kişand ser helwesta gel a li dijî hikumetê û wiha axivî: “Gel ew ji partiya yekemîn kirin partiya duyemîn. Qerta sor nişanî wan da. Niha dîsa dixwazin dest dînin ser şaredariyan. Dixwazin vîna gel tune bikin. Em li dijî vê yekê îtîraz dikin. Tu bingeha wan a zagonî tune ye. Li dijî zagon û Destûra Bingehîn tev digerin. Yên li vî welatî darbeye dikin, zagonan binpê dikin. Li vî welatî mafê welatiyê tê astengkirin. Dixwazin welatiyan ji welatîbûnê derxin. Eger li vî welatî mirov neyên hilbijartin û hilbijêr mirovên dixwazin hilbijêrin, wê demê emê çawa qala demokrasiyê bikin.”
Qeyûm meseleya 85 milyon e
Gulistan Kiliç Koçyîgit, bal kişand ser armanca AKPê û wiha bi dawî kir: “ Eger AKP sibê wê hêzê di xwe de bibîne dê parlamentoyê fesih bike û qraltiya xwe îlan bike. Ji ber vê yekê ev mesele ne tenê meseleya kurdan e. Ev mesele meseleya 85 milyon welatiyên Tirkiyeyê ye. Qeyûm tayînî vîna gelê kurd tenê nehatiye kirin. Qeyûm tayînî vîna hemû gelê Tirkiyeyê kiriye. Ji ber vê yekê divê em bêtir bi hevre bin. Em li vir in û em bi hevre ne. Me milê xwe daye hev û ji niha û şînde têkoşîna me ya hevpar dê bidome.”
Komê bê navber dirûşmeya “Qeyûm darbe ye. Ji darbeyan re na” berz kir. Piştre Serokê Koma CHPê Mûrat Emîr û Serokê Koma Partiya Rêya Nû Bulent Kaya jî axaftin kirin û dijberiya xwe ya qeyûman anîn ziman.
